Douglas (Manx-Gaelies: Doolish) is die hoofstad en grootste stad van die eiland Man, 'n selfregerende Britse kroonbesitting. Die stad het 'n bevolking van 27 938 mense in 2011 gehad. Dit is geleë aan die monding van die rivier Douglas, en aan 'n baai van drie kilometer. Die rivier Douglas vorm deel van die stad se hawe en hoof kommersiële hawe.

Douglas
Doolish

Kaart Vlag
Wapen
 Land Vlag van Verenigde Koninkryk Verenigde Koninkryk
 Land Vlag van Eiland Man Man (eiland)
 Koördinate 54°09′25″N 04°29′12″W / 54.15694°N 4.48667°W / 54.15694; -4.48667
 Gestig op 1192
 Oppervlakte:  
 - Totaal
 Hoogte bo seevlak 50 m
 Bevolking:  
 - Totaal (2011) 27 938
 - Bevolkingsdigtheid
 Tydsone GMT / UTC+0
 - Somertyd BST / UTC+1
 Burgemeester R. H. McNicholl
 Amptelike webwerf www.douglas.gov.im

Ontstaan wysig

 
Loch Promenade tydens 'n storm, 1890's
 
Douglas se Promenade langs die baai
 
Seeterminaal in Douglas

Douglas was 'n klein nedersetting totdat dit vinnig gegroei het as gevolg van bande met die Engelse hawe van Liverpool in die 18de eeu. Verdere bevolkingsgroei het die volgende eeu gevolg, wat gedurende die 1860's gelei het tot 'n gefaseerde verskuiwing van die Hooggeregshof, die Luitenant-goewerneur se woning, en uiteindelik die setel van die wetgewer, Tynwald, na Douglas vanaf die antieke hoofstad, Castletown.

Die stad is die eiland se hoofspil vir besigheid, finansies, regsdienste, verskeping, vervoer, inkopies en vermaak. Die jaarlikse "Isle of Man TT"-motorfietsren begin en eindig in Douglas.

Douglas was die tuiste van die Summerland-ontspanningsentrum, wat in 1973 in 'n katastrofiese brand verwoes is.

Onlangse geskiedenis wysig

Tydens die Eerste- en Tweede Wêreldoorloë was Douglas en ander dele van die eiland Man die tuiste van interneringskampe vir "vyandige vreemdelinge". Douglas het tydens die Tweede Wêreldoorlog sewe uit die tien interneringskampe op die eiland bedryf, insluitend: Hutchinson, Metropole, Central, Palace, Granville en Sefton Camp. Gedeeltes van die Promenade is afgesper en baie gastehuise is vir dié doel gebruik. Die gesneuweldes van die eiland word met die Douglas Oorlogsgedenkteken herdenk.

Geografie wysig

Douglas is aan die oostekant van die eiland naby die samevloeiing van die twee riviere Dhoo en Glass wat die Douglas vorm. By Douglas vloei die rivier deur die kaai en in Douglasbaai in. 'n Effens skuins vallei loop die binneland in en daar is heuwels rondom die stad. Die stad word omring deur verskeie dorpies, soos Onchan in die noordooste en Union Mills in die weste.

Klimaat wysig

Die weerstasie naaste aan Douglas is die kusweerstasie by Ronaldsway, ongeveer 11 km suidwes van Douglas. Die hoogste temperatuur wat in Ronaldsway aangeteken is, staan op 28.9 °C, aangeteken in Julie 1983. Die gemiddelde hoogste temperatuur vir die jaar is 24.1 °C (75.4 °F).

Ronaldsway kry gemiddeld 14,5 dae ryp per jaar in die tydperk 1981–2010 aangeteken. Die laagste temperatuur wat in Ronaldsway aangeteken is, is −9.1 °C (15.6 °F), aangeteken in Desember 1961. Vir die tydperk 1981–2010 was die gemiddelde laagste temperatuur van die jaar −3.4 °C (25.9 °F).

Vervoer wysig

Douglas is die middelpunt van die eiland se busnetwerk, met gereelde dienste na Port Erin, Peel en Ramsey, sowel as verskeie plaaslike busdienste. Die dorp is ook die eindpunt van die twee hoofspoorlyne op die eiland: die stoomtrein na Port Erin en die elektriese tremweg na Ramsey. Dit is ook die tuiste van die veerbootterminal, met gereelde dienste na Heysham en Liverpool en af en toe dienste na Dublin en Belfast.