Dune (roman)
Dune is 'n wetenskapfiksieroman uit 1965 deur die Amerikaanse skrywer Frank Herbert, oorspronklik gepubliseer as twee afsonderlike reekse in die tydskrif Analog. Dit is die eerste aflewering van die Dune sage; in 2003 word dit aangewys as die wêreld se topverkoper-wetenskapfiksieroman.
Dune
| |
|---|---|
| Skrywer | Frank Herbert |
| Land | Verenigte State |
| Taal | Engels |
| Reeks | Dune reeks |
| Genre | Wetenskapsfiksie[1] |
| Uitgewer | Chilton Books |
| Uitgegee | Augustus 1965 |
| Medium | Druk (hardeband en sagteband) |
| Bladsye | 412 |
| Vervolg | Dune Messiah |
Dune speel af in die verre toekoms te midde van 'n feodale interstellêre samelewing waarin verskillende edele huise planetêre leengoed beheer. Dit vertel die verhaal van die jong Paul Atreides, wie se familie die bestuur van die planeet Arrakis aanvaar. Alhoewel die planeet 'n onherbergsame en ylbevolkte woestyn is, is dit die enigste bron van melange, 'die spesery'; 'n middel wat lewe verleng en verstandelike vermoëns versterk. Melange is ook nodig vir ruimtevaart, wat 'n soort multidimensionele bewustheid en versiendheid vereis wat slegs die geneesmiddel bied. Aangesien melange slegs op Arrakis geproduseer kan word, is beheer oor dié planeet dus 'n gesogte en gevaarlike onderneming.
Die verhaal ondersoek die veelvlakkige interaksies van politiek, godsdiens, ekologie, tegnologie en menslike emosie, terwyl die ryk se faksies mekaar in 'n stryd om beheer van Arrakis en sy speserye konfronteer. Herbert het vyf vervolgverhale hierop geskryf: Dune Messiah, Children of Dune, God Emperor of Dune, Heretics of Dune en Chapterhouse: Dune.
Sedert 2009 is die name van planete uit die Duinromans aangeneem vir die werklike nomenklatuur van vlaktes en ander kenmerke op Saturnus se maan Titaan.
Lys van Dune-flieks, televisiereekse en speletjies
wysig- 1979 - Dune. 'n Bordspeletjie uitgegee deur Avalon Hill. Die doel van die spel is om jou unieke voordele bo die teenstanders te ontgin en drie van die vyf vestings op die spelbord met jou leërs te verower.
- 1984 - Dune. 'n Fliek geregisseer deur David Lynch.
- 1984 - Dune. 'n Bordspeletjie uitgegee deur Parker Bros. 'n Veel meer oppervlakkige speletjie as die Avalon Hill-weergawe.
- 1990 - Dune. 'n Rekenaarspeletjie waarin die speler die rol van Paul Atreides aanneem.
- 1992 - Dune 2. 'n Rekenaarspeletjie waarin die speler kies om hom aan Genus Harkonnen, Genus Atreides of die apokriewe Genus Ordos te skaar.
- 2000 - Dune 2000. 'n Verbeteting van die 1992-speletjie.
- 2000 - Dune. 'n Minireeks vervaardig deur die American Sci-Fi Channel, gebaseer op die eerste boek.
- 2002 - Emperor: Battle for Dune. Weereens 'n rekenaarspeletjie waarin jy een van drie kante kies.
- 2003 - Children of Dune. 'n Vervolg op die minireeks uit die jaar 2000. Gegrond op die boeke Dune Messias en Children of Dune.
- 2021 - Dune. 'n Film geregisseer deur Denis Villeneuve.
Bronne
wysig- Clute, John; Nicholls, Peter (1995). The Encyclopedia of Science Fiction. New York: St. Martin's Press. p. 1386. ISBN 0-312-13486-X.
- Clute, John; Nicholls, Peter (1995). The Multimedia Encyclopedia of Science Fiction (CD-ROM). Danbury, CT: Grolier. ISBN 0-7172-3999-3.
- Nicholls, Peter (1979). The Encyclopedia of Science Fiction. St Albans, Herts, UK: Granada Publishing Ltd. p. 672. ISBN 0-586-05380-8.
- Jakubowski, Maxim; Edwards, Malcolm (1983). The Complete Book of Science Fiction and Fantasy Lists. St Albans, Herts, UK: Granada Publishing Ltd. p. 350. ISBN 0-586-05678-5.
Verwysings
wysig- ↑ Hanson, Matt (2005). Building Sci-fi Moviescapes: The Science Behind the Fiction. Gulf Professional Publishing. ISBN 978-0-240-80772-0.