Dzūkija

Dzūkija of Dainava is een van die vyf historiese etnografiese geweste in Litaue. Dzūkija, wat in die suide van die land geleë is, behels die distrik Alytus en die grootste deel van die distrik Vilnius, insluitende die Litause hoofstad. Dit is veral 'n kulturele gewes wat volgens die tradisionele leefstyle en dialekte van die plaaslike Litause bevolking (meestal boere in plattelandse gebiede) gedefinieer word, maar nooit as 'n politieke of administratiewe eenheid bestaan het nie. Alytus word - ofskoon dit nie die grootste nedersetting in Dzūkija is nie - tradisioneel as sy hoofstad beskou.

In die Middeleeue is Dzūkija minder sterk deur die magsuitbreiding en aanvalle van die Duitse Orde geraak as die ander vier etnografiese geweste. Die distrik Vilnius, wat in die ooste aan Wit-Rusland grens, word deur 'n groot minderheid inheemse Poolssprekendes bewoon, terwyl daar in die Alytus-distrik, wat aan Pole grens, net baie klein groepe Poolssprekendes aangetref word. In albei distrikte is daar ook minderhede Wit-Russe.