Erina Bezuidenhout
| Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Erina Bezuidenhout raak veral bekend vir haar talle huishoudkundeboeke oor die kookkuns, naaldwerk en hekel en sy skryf ook ’n jeugverhaal.
Lewe en werk wysig
Erina Bezuidenhout (néé Huisamen) is in 1929 gebore. Haar vader is Danie Huisamen, wat die eerste skoolhoof op Grootderm was. Sy het ’n broer, Jan (skrywer van “Katryn: Vrou van die Richtersveld”) en ’n suster, Nancy (Kitshoff, skryfster van verskeie hekelboeke).
Skryfwerk wysig
Sy skryf die jeugverhaal “Avontuur langs die Oranje”, wat afspeel langs die Oranjerivier in Namakwaland, naby Alexanderbaai se diamantdelwery. Die drie seuns Heelal, Sokkie en Tarzan besluit om ondersoek in te stel na ’n geheimsinnige lig wat van tyd tot tyd by ’n verlate Duitse fort oorkant die rivier opgemerk word. Omdat die fort in geproklameerde diamantgebied geleë is, mag niemand daar kom nie en om hul nuuskierigheid te bevredig, moet die seuns baie waag. Hulle kry hul eerste skok toe hulle hoor hoe ’n vrou by die fort ’n liedjie sing. Gou ontdek hulle dat daar ook ’n man in die fort woon. Hul besef gou dat hy met iets onwettigs besig is maar presies wat dit is weet hulle nie. Dit neem nie lank voordat hulle dit vasstel nie en dan begin hul onvergeetlike avontuur langs die Oranje.
Erina is egter veral bekend as skryfster van huishoudkundeboeke, insluitende boeke met resepte en oor die kookkuns, naaldwerk en hekel. Titels sluit in “My beste nagereg”, “Beproefde kitsgeregte”, “Terte vir alle smake”, “Slaai- en groenteresepte”, “Ligte aandetes”, “Beproefde koekresepte”, “Resepte vir die vrieskas”, “Kos vir die kampeerder”, “Ontbytresepte”, “Wenresepte”, “Bottel en bêre”, “Vleisresepte”, “Maklike maalvleisgeregte” “Vinnige visresepte”, “Southappie-resepte”, “Beproefde Fondueresepte”, “Heerlike hoendergeregte”, “Resepte vir koeldrank en roomys”, “200 Pragtige planne met pannekoek”, “Geregte van blikkiesvleis en oorskietvleis”, “Keurige kos”,”300 Kitsgereggies”, “Bak ’n broodjie”, “Resepte vir hamburgers en frikkadelle”, “Braaikos en buitekos”, “101 Planne met omelette”, “Hoofgeregte sonder vleis of vis”, “Etes vir 2”, “Kospakkies”, “Maklike spyskaarte vir die huisgesin”, “1 000 wenke vir elke vrou”, “Tuisverdienstes vir die vrou Deel I-V”, en “Maak u eie seep tuis”.
Publikasies wysig
| Jaar | Publikasies |
|---|---|
| 1974 | Avontuur langs die Oranje |