Fjodor I van Rusland
Fjodor I Iwanowitsj (Russies: Фёдор I Иоаннович) (31 Mei 1557 – 17 Januarie 1598) was van 1584 tot 1598 tsaar, die laaste heerser van Rusland se Rjoerik-dinastie. Dié seun van Iwan die Verskriklike is ook "Fjodor die Klokluier" genoem vanweë sy gewoonte om deur die land te reis en kerke se klokke te lui.
| Fjodor I | |
|---|---|
| Tsaar van die hele Rusland | |
| |
| Dinastie | Rjoerik |
| Bewind | 1584–1598 |
| Kroning | 31 Mei 1584 |
| Volle naam | Fjodor Iwanowitsj |
| Gebore | 31 Mei 1557 |
| Gesterf | 17 Januarie 1598 |
| Voorganger | Iwan die Verskriklike |
| Opvolger | Boris Godoenof |
| Gade | Irina (Aleksandra) Fjodorowna Godoenowa |
| Vader | Iwan die Verskriklike |
| Moeder | Anastasia Romanowna Zacharina-Joerijewa |
Fjodor, wat na bewering verstandelik gestrem was, het feitlik glad nie in die politiek belang gestel nie. Hy was vroom en het die meeste van sy tyd in gebed deurgebring. Hy het ’n land beërwe wat verwoes was deur die buitensporighede van sy pa, Iwan die Verskriklike, en het die regering van die land oorgelaat aan sy swaer, Boris Godoenof.
Hy trou in 1580 met Irina (Aleksandra) Fjodorowna Godoenowa, Boris se suster. Ná twaalf jaar van getroude lewe skenk Irina in 1592 die lewe aan ’n dogter, Fjodosia. Toe sy in 1594 op tweejarige ouderdom sterf, stort die tsaar geestelik ineen. Omdat hy geen ander kinders het nie, kom die eeue oue Rjoerik-dinastie met sy dood tot ’n einde en betree Rusland die Tyd van Beroeringe. Fjodor het in Moskou gesterf en is in die Kremlin begrawe.