Fokker Eindecker

Die Fokker Eindecker was 'n reeks van vegvliegtuie wat deur Duitsland gebruik is tydens die Eerste Wêreldoorlog. Die vliegtuig was 'n enkelsitplek, enkelmotor, monovlerkvliegtuig wat ontwikkel is uit die vooroorlogse Fokker M.5. Soos die M.5 het dit nie oor rolroere beskik nie maar vlerkbuig tegnologie gebruik om te rol. Dit was die eerste vliegtuig wat toegerus was met 'n gesinchroniseerde vuurmeganisme, wat toegelaat het dat die masjiengeweer deur die skroef kon vuur. Hierdie meganisme het aan die vliegtuig 'n groot voordeel verleen en van vele oorwinnings verseker. Dit het op 1 Augustus 1915 begin toe Max Immelmann sy eerste, asook die Eindecker se eerste oorwinning behaal het. Die feit dat die vlieënier kon vuur op sy lyn van vlug het aan hulle 'n groot voordeel gegee. Dit het aan die Duitsers 'n tydperk van beheer oor die lugruim op die Wes-front verseker en het 'n tydperk begin wat die Fokker Scrourge genoem is.

Fokker Eindecker
Oorgeneemde Fokker E.III 210/16 in vlug te Upavon, Wiltshire in 1916.
Tipe	Monovlerkvegvliegtuig
Vervaardiger	Fokker
Ontwerp deur	Martin Kreutzer
Nooiensvlug	23 Mei 1915
Aantal gebou	416

Bobaasvlieëniers soos Immelmann en Oswald Boelcke het 'n gros oorwinnings behaal met die Eindecker wat van hulle nasionale helde gemaak het. Tog het die Eindecker nie sy volle potensiaal bereik nie, deels omrede die Duitsers bang was dat een in die hande van die Geallieerdes kan val en hulle dus die sinchronisasie tegnologie kan namaak en tweedens omrede produksie probleme veroorsaak het dat daar nooit meer as 100 in diens was nie.

Tegniese besonderhede

Besonderhede van die Fokker Eindecker:

Item	Statistiek
Aantal motore	1
Tipe motor	Skroef
Vervaardiger	Oberursel U.I 9-silinder motor.
Kraglewering per motor	100 perdekrag
Vlerkspan	9,5 m
Lengte	7.2 m
Hoogte	2,4 m
Vlerkoppervlakte	16,0 m2
Maks. opstygmassa	610 kg
Maksimum snelheid	140 km/h
Operasionele hoogte	3 500 m
Togafstand	1,5 uur
Klimvermoë	3 000 m in 30 minute
Bewapening	Een gesinchroniseerde 7,92 mm masjiengeweer

Sien ook

• Lys van vegvliegtuie

Bron

• Crosby, Francis: THE WORLD ENCYCLOPEDIA OF FIGHTERS & BOMBERS. 2015. ISBN 978-1-84476-917-9