Friedrich Gustav Jonathan Eckstein
Friedrich Gustav Jonathan Eckstein (1857 - 1930) was 'n goudmagnaat. Hy is in Stuttgart, Duitsland gebore as die jonger broer van Hermann Ludwig Eckstein. Sy pa was 'n Lutherse pastoor. Hy woon 'n ruk lank in Indië en kom in 1887 in die Witwatersrand aan. Ten tye van die Tweede Vryheidsoorlog rig hy sy hoofkantoor in Londen in. Hy was een van dié wat in beheer van die firma Wernher, Beit & Co was. In 1912 volg hy Jules Porgès as voorsitter op. As gevolg van sy Duitse agtergrond ondervind hy baie onaangenaamhede tydens die Eerste Wêreldoorlog en bedank as voorsitter. Hy word later tot ridder geslaan en wy hom aan die kweek van katoen in die Soedan.
