Frigiese Dinastie
Die Frigiese Dinastie, ook bekend as die Amoriaanse Dinastie, was ’n familie wat vir ’n kort rukkie oor die Bisantynse Ryk regeer het, van 820 tot 867. Die stigter van die dinastie is Michael II. Hy het vinnig opgang gemaak in die leër danksy sy voorganger, Leo die Armeen. Hy het egter in 820 die sluipmoord op Leo beplan en sy bewind oorgeneem.
| Frigiese Dinastie | |
|---|---|
 Michael III
| |
| Tydperk | 820-867 n.C. |
| Keisers | Michael II Theophilus Michael III |
| Voorganger | Leo V |
| Opvolger | Masedoniese Dinastie |
Michael II is op 2 Oktober 829 dood. Hy is deur sy seun, Theophilus, opgevolg wat in 822 as medekeiser gekroon is. Hy het sy leërs persoonlik aangevoer in sy lewenslange oorlog teen die Moslemse Arabiere, wat in 831 begin het. Hy is op 20 Januarie 842 dood.
Sy seun, Michael III wat hom opgevolg het, het ’n belangrike rol gespeel in die opbloei van Bisantynse mag in die 9de eeu. Hy is reeds in 840 deur sy pa as medekeiser gekroon en was pas twee jaar oud toe hy op 20 Januarie 842 alleenheerser word. Terwyl hy minderjarig was, was sy ma, haar oom en ’n minister die regente. Onder invloed van twee ooms, Bardas en Petronas, het Michael die regentskap op 15 Maart 856 omvergewerp en sy ma en susters in 857 na ’n klooster gestuur. Die bekering van die Bulgare tydens sy bewind word beskou as een van die grootste kulturele en politieke prestasies van die Bisantynse Ryk.
Michael III het nie kinders by sy vrou, Eudokia Dekapolitissa, gehad nie en het sy minnares, Eudokia Ingerina, met sy gunsteling-kamerheer, Basilius die Masedoniër, laat trou. Daar word wyd geglo Michael was die pa van haar seun Leo VI die Wyse, wat in 886 keiser geword het.
Basilius het Michael in September 867 laat vermoor en as medekeiser het hy outomaties die nuwe keiser geword.