Geoktrooieerde rekenmeester (Suid-Afrika)

Geoktrooieerde rekenmeester (SA) is die titel van 'n sekere klas lede van die Suid-Afrikaanse Instituut van Geoktrooieerde Rekenmeesters (SAIGR). Dit is die hoogste professionele rekeningkundige kwalifikasie wat in Suid-Afrika behaal kan word en geregistreerde geoktrooieerde rekenmeesters mag die agtervoegsel GR(SA) by hulle titels gebruik.

Geoktrooieerde rekenmeesters se opleiding sluit in rekeningkunde, ouditkunde, finansiële bestuur, belasting en handelsreg en hulle is gesogte werknemers in menige dissiplines van die sake- en akademiese wêreld wat dikwels topsalarisse kan beding. As gevolg van die hoë standaard van opleiding is Suid-Afrikaanse geoktrooieerde rekenmeesters ook baie gesog in die buiteland. Navorsing deur die SAIGR in 2007 het onthul dat van die 2 227 direkteure van die top 200 maatskappye op die JSE Sekuriteitebeurs, 662 (ongeveer 30%) GR(SA)'s was. Van die top 50 maatskappye se hoof- finansiële beamptes was 82% geoktrooieerde rekenmeesters en van die top 50 se hoof-uitvoerende beamptes was 22% GR's. Selfs onder die voorsitters van die top 50 was 18% geoktrooieerde rekenmeesters.^[1]

Om by die SAIGR te registreer, moet 'n voornemende GR die volgende vermag:

'n Sertifikaat in die Teorie van Rekeningkunde (STR) behaal. Sekere Suid-Afrikaanse universiteite is deur die SAIGR geakkrediteer om 'n STR uit te reik wanneer 'n spesifieke honneursgraad in rekeningkunde behaal word.
Beide dele van die SAIGR kwalifiserende eksamen slaag. Deel 2 kan slegs aangepak word indien die kandidaat reeds Deel 1 geslaag het en 18 maande se opleiding as geregistreerde leerlingrekenmeester voltooi het.
'n Driejarige opleidingskontrak voltooi by 'n firma van geoktrooieerde rekenmeesters in openbare praktyk, of by 'n goedgekeurde maatskappy in die handel en nywerheid.

Ingevolge die huidige maatskappywet moet alle openbare- en privaatmaatskappye jaarliks geoudit word. Slegs persone wat by die Openbare Rekenmeesters- en Ouditeursraad (OROR) geregistreer is kon ingevolge die Wet op Openbare Rekenmeesters en Ouditeurs 'n statutêre oudit verrig. Slegs persone wat as geoktrooieerde rekenmeesters (SA) geregistreer is, kan by die Openbare Rekenmeesters- en Ouditeursraad registreer.

Die speelveld het van 2007 af ingrypend verander. Kandidate sal nou ingevolge die nuwe Ouditprofessiewet, wat die Wet op Openbare Rekenmeesters en Ouditeurs vervang, die kwalifiserende eksamen van die nuwe Onafhanklike Reguleringsraad vir Ouditeure (ORO) moet slaag om die statutêre ouditfunksie te mag verrig. Die akkreditasie van instellings wat voldoen aan die toelatingsvereistes tot die kwalifiserende eksamen van die ORO word nie meer net tot die SAIGR beperk nie.

Eksterne skakels

Verwysings

↑ SAIGR tuisblad^{[dooie skakel]}

[1] SAIGR tuisblad^{[dooie skakel]}

[1]