Gerard Bhengu

Gerard Bhengu (1910–1990; ook bekend as Bengu Benghu) was ’n Suid-Afrikaanse kunstenaar. Hy was selfonderleg en het in waterverf en sepia (swartbruin verf uit die blaas van 'n inkvis) gewerk. Hy is veral bekend vir sy portretstudies en uitbeelding van die townshiplewe van Durban.

Gerard Bhengu
Gebore	(1910-09-06)6 September 1910 Mariannhill-sendingstasie, Centecow, Natal
Sterf	1990 Umlazi
Nasionaliteit	Suid-Afrika
Opleiding	Selfonderleg

Beknopte biografie

Gerard Bhengu is op 6 September 1910 by die Mariannhill-sendingstasie in Centecow, Natal gebore. Hy is aan die Rooms-Katolieke sendingskool van Esibomvwini in Centecow onderrig, waar sy talent ontdek is.

Van 1926 tot 1931 maak Bhengu 150 sketse waarin hy die landelike stamlewe in Centecow vir dr. Max Kohler dokumenteer. Kohler het van hierdie tekeninge gebruik om sy etnografiese en mediese publikasies te illustreer. Van 1932 tot 1933 het hy in Ixopo gewoon, waar hy in opdrag van biskop Fleischer 'n aantal prente met godsdienstige temas verf. Daarna is hy van 1934 tot 1937 by die Edendale-opleidingskollege onder die borgskap van dr. D.M. Malcolm (Hoofinspekteur van Inheemse Onderwys in Natal) en mnr. S.R. Dent (Inspekteur van Inheemse Onderwys) onderrig.

Die Departement van Naturellesake het hom gevra om 'n muurskildery vir die Ryksuitstalling te verf, wat die ontwikkeling van swart mense 'van dorp na universiteit' uitbeeld. Hy het dit nooit voltooi nie, maar het nogtans die uitstalling in Johannesburg bygewoon.

Van 1940 tot 1949 skilder hy tonele van die alledaagse Zoeloe-lewe en portrette van swart mense. Hierdie skilderye is in die Payne Brothers-afdelingswinkel in Weststraat, Durban verkoop.

Van 1959 het hy in Cato Manor gewoon, totdat dit gesloop is, waarna hy na Umlazi in Durban verhuis. Hy het Zoeloe-verhale vir Phyllis Savory se Bantu Fireside Tales (1958) geïllustreer. In die 1960's illustreer hy 'n boek oor sy eie lewe en werk, wat ook deur Phyllis Savory geskryf is.

Bhengu is in 1990 oorlede.