Gereformeerde kerk Namib-Kus

Die Gereformeerde kerk Namib-Kus is die naasjongste van die 15 gemeentes in die GKSA se Klassis Waterberg. Dis een van vyf Nambiese gemeentes wat tot dié Klassis behoort, pleks van die Klassis Etosha, soos al die ander Gereformeerde kerke in die land. Die Gereformeerde kerk Otjiwarongo het in 2015 teruggegaan van Waterberg na Etosha.

Die Gereformeerde kerk Namib-Kus is in 2006 gestig en sluit die dorpe Walvisbaai, Swakopmund en Hentiesbaai in. Einde 2011 was hier 23 belydende en vier dooplidmate, maar einde 2015 het dit toegeneem tot onderskeidelik 31 en agt. In dieselfde tyd het die Gereformeerde kerk Walvisbaai se belydende lidmate van 208 tot 202 afgeneem en die dooplidmate van 66 tot 65. Die Gereformeerde kerk Hentiesbaai se belydende lidmate het van 62 tot 57 afgeneem en sy dooplidmate van drie tot vyf toegeneem.

Ds. J.P. le Roux bedien Namib-Kus sedert 2013 in kombinasie met Khomas-Hoogland en Aranos, wat albei ook tot die Klassis Waterberg behoort. Die afstand wat hy moet aflê van Aranos na Hentiesbaai oor Swakopmund is sowat 760 km.

Predikant

1. Le Roux, Jacobus Petrus, 2013 – hede (in kombinasie met Aranos en Khomas-Hoogland)

Bronne

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• (af) Vogel, Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.