Gerhardus Petrus Christiaan de Kock

Dr. Gerhardus Petrus Christiaan de Kock, beter bekend as Gerhard de Kock (14 Februarie 1926 – 7 Augustus 1989), was die sesde goewerneur van die Suid-Afrikaanse Reserwebank. Hy was die seun van dr. M.H. de Kock, wat die derde goewerneur van die Suid-Afrikaanse Reserwebank was. Suid-Afrika se grondwetlike reëlings is gedurende dr. Gerhard de Kock se ampstermyn verander. Hy was die eerste (en enigste) goewerneur van die Suid-Afrikaanse Reserwebank wat in die amp gesterf het. Sy termyn was vanaf 1 Januarie 1981 tot sy dood op 7 Augustus 1989. Hy is opgevolg deur Dr. Chris Stals.

Dr. Gerhardus Petrus Christiaan de Kock
Goewerneur van die Suid-Afrikaanse Reserwebank
Termyn 1 January 1981 – 7 August 1989
Voorganger	Theunis Willem de Jongh
Opvolger	Chris Stals
Persoonlike gegewens
Gebore	(1926-02-14)14 Februarie 1926 Kaapstad, Suid-Afrika
Sterf	07 Augustus 1989 (op 63) Pretoria, Suid-Afrika

So vroeg as in 1951 was dr Gerhard de Kock reeds betrokke die Reserwebank, hy het deeltyds gespesialiseerde navorsing gedoen. Aan die einde van 1955 sluit hy hom aan by die Bank as ekonoom. Kort na sy aanstelling is hy gekies om die Bank te verteenwoordig tydens die eerste kursus wat die Bank van Engeland vir buitelandse bankamptenare in Londen aangebied het. Vanaf 1 Julie 1962 is die pos wat deur dr De Kock beklee is, verander na ekonomiese adviseur en op 1 Januarie 1964 word hy aangestel as die hoof van die departement ekonomie.

In 1967 is sy pos se status opgegradeer en het hy vergaderings van die Raad van Direkteure begin bywoon. In Mei 1966 word hy vir 14 maande as spesiale ekonomiese adviseur vir die tesourie gesekondeer. Hy het uiteindelik die departement ekonomie in die middel van 1968 verlaat toe hy aangestel is as alternatiewe uitvoerende direkteur van die Internasionale Monetêre Fonds in Washington, D.C., as die verteenwoordiger van Suid-Afrika, Australië, Nieu-Seeland, Lesotho en Swaziland, 'n posisie wat hy tot in die middel van 1971 met onderskeiding beklee het.

Met sy terugkeer na Suid-Afrika is hy met ingang van 1 Julie 1971 as adjunk-goewerneur van die Reserwebank aangestel en daarna op 1 Julie 1976 tot senior adjunk-goewerneur. In 1977 is hy as spesiale ekonomiese adviseur aan die Ministerie van Finansies gesekondeer. Hy is ook gedurende hierdie tydperk aangestel as voorsitter van die Kommissie vir Ondersoek na die Monetêre Stelsel en Monetêre Beleid in Suid-Afrika. Hierdie kommissie het uiteindelik bekend gestaan as die De Kock-kommissie. Die finale fase in sy loopbaan het begin toe hy Dr. T. W. de Jongh opgevolg het as goewerneur van die Reserwebank, 'n pos wat hy tot sy dood in Augustus 1989 beklee het.

Dr. de Kock was ook 'n direkteur en later voorsitter van die Nasionale Finansiële Korporasie en die opvolger daarvan, die Korporasie vir Publirke Deposito's. Ander posisies wat deur hom beklee is, was dié van goewerneur vir Suid-Afrika op die Raad van die Internasionale Bank vir Heropbou en Ontwikkeling, Goewerneur vir Suid-Afrika op die Raad van die Ontwikkelingsbank vir Suider-Afrika, lid van die Komitee van Twintig en lid van die Eerste Minister se Ekonomiese Adviesraad.

Hy het 'n belangrike rol in professionele liggame gespeel deur aktiewe deelname en lesings te lewer. In 1980 en 1981 was hy die president van die Ekonomiese Gemeenskap van Suid Afrika. Hy dien ook een termyn as president van die Instituut van Bankiere in Suid-Afrika.

Ere-doktorsgrade en toekennings ontvang/ toegeken aan Dr de Kock het die volgende ingesluit:

1982 - D.Econ. (Universiteit van Natal) 1983 - Salprys vir ekonomie - (SA Akademie vir Wetenskap en Kuns) 1987 - D.Com. (Universiteit van Port Elizabeth) 1988 - D.Com. (Universiteit van Pretoria) 1990 - Frans du Toitmedalje - (SA Akademie vir Wetenskap en Kuns)

Ander onderskeidings sluit sy verkiesing in 1984 as ere-genoot van die Instituut vir Bankiers in Suid-Afrika in en sy verkiesing deur die tydskrif Euromoney as 'Central Banker of the Year' in 1988. Na sy dood het die Universiteit van Pretoria die Gerhard de Kock-gedenklesing ingestel, wat jaarliks deur 'n prominente persoonlikheid op die gebied van sentrale bankwese gelewer word.

'n Bronsborsbeeld van hom, deur die beeldhouer Jo Roos, staan by die ingang van die Gerhard de Kock-ouditorium in die Hoofkantoorgebou van die Reserwebank.