Glastonbury Tor
Glastonbury Tor (Kelties: Twr Avallach; Tor beteken "berg", "aarde", "koniese heuwel") is 'n 158 meter hoë heuwel naby Glastonbury, Engeland.
Sy twee opvallende kenmerke is die unieke ligging temidde 'n vlakte, die Somerset Meadows, 'n vroeëre moerasland wat drooggelê is om as landbougebied te dien en deel uitmaak van die Somerset Levels, en die daklose bouvalle van die St. Michael's-toring wat daarop opgerig is. Die plek word tans deur die National Trust bestuur.
Tor is 'n plaaslike term van Keltiese herkoms wat na 'n heuwelpiek verwys. Glastonbury Tor het vroeër soos 'n eiland bo die moerasgebied uitgesteek, maar dit is tans eerder 'n skiereiland wat aan drie kante deur die Brue-rivier begrens word. In 1892 is die oorblyfsels van Glastonbury Lake Village naby die heuwel ontdek. Hulle het die argeologiese bewys gelewer dat daar tussen 300 en 200 v.C. 'n Ystertyd-nedersetting bestaan het wat as eiland in die moerasgebied maklik verdedig kon word. Aardwalle en Romeinse oorblyfsels getuig van latere bewoners. Die Keltiese Britte het na die plek blykbaar as Ynys yr Afalon ("Eiland van Avalon") verwys, en vir sommige is Glastonbury Tor inderdaad die legendariese Avalon van koning Artus.
Die hellings van Glastonbury Tor lyk asoof daar terrasse aangelê is. Vir sommige is hierdie terrasse die oorblyfsels van 'n ou heilige doolhof wat moontlik in die Jong-Steentydperk ontstaan het, terwyl ander deskundiges aanneem dat die terrasse deur generasies van weidende diere gevorm is - 'n natuurlike verskynsel wat teen talle grasbedekte hellings waargeneem kan word mits hulle as weivelde gebruik word.
'n Namaaksel van Glastonbury Tor is vir die openingseremonie van die Olimpiese Somerspele 2012 in Londen gebruik. Hier is onder meer die vlae van deelnemerstate geplaas.
Eksterne skakels
wysig| Wikimedia Commons bevat media in verband met Glastonbury Tor. |