Gonopodium
'n Gonopodium of kopulasievin is 'n gespesialiseerde anale vin wat by mannetjies van verskeie soorte levendbarende visse in die families Anablepidae en Poeciliidae voorkom.
Die gonopodium is beweeglik en word vir paring gebruik. Die 3de, 4de en 5de straal van die vin is tot 'n buis saamgevoeg, waardeur die hom (vissperma) geëjakuleer word.
By sommige soorte is die gonopodium so lank, dat dit tot die helfte van die liggaam se lengte is. Soms is die vin so groot dat dit nie meer gebruik kan word nie, soos in sommige kweekvorme van die Swaarddraer (Xiphoporus helleri).
Hormoon behandelde vroutjies kan ook 'n gonopodium ontwikkel, maar kan egter nie vir voortplanting gebruik word nie.
Soortgelyke organe word in ander vissoorte aangetref, soos die andropodium by Hemirhamphodon en Goodeidae.
