Graham McIntosh
Graham Brian Douglas McIntosh (Pretoria, 18 Januarie 1944 - ) is 'n Suid-Afrikaanse politikus en boer.
Hy behaal 'n B.A. en H.O.D. aan die Universiteit van Kaapstad en daarna 'n meestersgraad aan die Universiteit van Cambridge. In 1974 volg hy A. Hopewell, wat van 1953 tot 1974 Volksraadslid vir Pinetown was, op as L.V. toe hy in die algemene verkiesing met 'n meerderheid van 890 stemme teen die Progressiewe Party se A.S. Pitman wen. Hy bly tot 1977 in die Verenigde Party, maar toe die party ontbind, sluit hy hom by die Progressiewe Federale Party aan en nié by die V.P. se opvolger, die Nuwe Republiek Party, nie. As P.F.P.-kandidaat wen hy in 1981 in Pietermaritzburg-Noord en keer na die Volksraad terug. In 1987 verslaan die kandidaat van die Nasionale Party hom, maar van 1999 tot 2004 dien hy as Demokratiese Party-lid in die Nasionale Vergadering. Hy was ook president van die KwaZulu-Natalse Landbou-unie van 1995 tot 1998. Ná hy uit die Nasionale Vergadering tree, gaan boer hy voltyds en was ook 'n aktivis vir die A.C.D.P..
McIntosh is op op 11 Desember 1971 getroud met Susana Jansen van Rensburg. Hulle het drie seuns, waarvan die een, Angus McIntosh, getroud is met 'n dogter van Dick Enthoven,[1] wat nes McIntosh sr. die eerste keer in 1974 V.P.-L.V. geword het en wel in Randburg.
McIntosh word op 2 Junie 2011 opnuut 'n parlementslid, dié keer vir Cope.
Bronne
wysig- Who's Who of Southern Africa 2006. Cape Town: Who's Who of Southern Africa.