Pinetown (kiesafdeling)

Pinetown was van 1953 se algemene verkiesing tot aan die einde van die Driekamerbedeling in 1994 'n kiesafdeling vir die Suid-Afrikaanse Volksraad en is strykdeur altyd deur opposisiekandidate gewen.

In die heel eerste verkiesing wen die Verenigde Party se A. Hopewell in Pinetown met 'n meerderheid van 7 128 teen die Nasionale Party se J.T.J. Fourie. Hopewell word dan ook in 1958 onbestrede verkies. In die volkstemming oor republiekwording in 1960 stem Pinetown se kiesers, soos trouens die hele Natal buiten Newcastle en Vryheid, oorweldigend teen die republiek. Van die totaal van 10 767 wat gestem het, was net 1 705 ten gunste van die republiek, maar 9 016 was daarteen. In die algemene verkiesing van 1961 staan die N.P. dus ook terug en wen Hopewell die tweestryd met P. Malherbe van die Progressiewe Party met 'n meerderheid van 1 968 stemme.

In 1966, toe die Nasionale Party onder dr. H.F. Verwoerd veel moeite gedoen het om meer Engelse steun te lok, wen Hopewell weliswaar met 'n meerderheid van 3 071, maar S.F. Redelinghuys van die N.P. is tweede en H.A. Oliver van die P.P. slegs derde met 1 356 stemme. Die Front, 'n Natalse splinterpartytjie, se P.D. Dunning kry net 256 stemme. Teen die algemene verkiesing van 1970 het Pinetown 'n buitengewone hoë getal kiesers van 18 220, vergeleke met 'n landswye gemiddeld van 12 200. Hopewell wen die vyfde keer agtereenvolgens, dié keer weer net teen 'n P.P.-kandidaat, R. Douglas, met 'n meerderheid van 6 435 nadat 72,5% van die kiesers hul kruisie getrek het.

In 1974 staan Hopewell nie weer nie, maar Graham McIntosh wen naelskraaps vir die V.P. met 890 stemme teen A.S. Pitman van die P.P. Pitman gaan baklei egter in die tussenverkiesing van 5 Mei 1976 opnuut teen die V.P., dié keer as kandidaat van die nuwe Progressiewe Reformiste Party, in Durban-Noord en wen met 4 243, 'n meerderheid van 324 teenoor die V.P. se W.B. Reynolds. Denis Worrall het 3 139 stemme vir die N.P. gekry.

Partye en kandidate gewen wysig

Bronne wysig

  • Amptelike Jaarboek van die Republiek van Suid-Afrika 1983. 1983. Johannesburg: Chris van Rensburgpublikasies.
  • Schoeman, B.M. 1977. Parlementêre verkiesings in Suid-Afrika 1910-1976. Pretoria: Aktuele Publikasies.