Gustav Christian Schwabe
Gustav Christian Schwabe (* 10 Mei 1813; † 10 Januarie 1897) was 'n Duitse boorling en Britse koopman en finansier wat ondernemings soos John Bibby & Sons, Harland and Wolff en die redery White Star Line van kapitaal voorsien het.
Gustav Christian Schwabe | |
|---|---|
| Gebore | 10 Mei 1813 |
| Sterf | 10 Januarie 1897 19 Kensington Palace Gardens, Londen |
| Nasionaliteit | Duitsland / Verenigde Koninkryk |
| Beroep | Koopman en finansier |
| Eggenoot | Helen Dugdale |
Schwabe, 'n boorling van Hamburg, Duitsland, het hom in 1838 in Liverpool gevestig waar hy die grootste deel van sy beroepslewe sou deurbring. Later het hy meer tyd in sy huis in Londen deurgebring en in 1893 afgetree.
Vroeë lewe
wysigGustav Schwabe is in Hamburg as seun van Philipp Benjamin Schwabe, 'n Joodse koopman, en sy tweede vrou, Rosalie Levi, gebore. Gustav het drie broers en 'n halfbroer, Ludwig Philipp uit sy pa se vorige huwelik, gehad. In Junie 1819, toe Gustav ses jaar oud was, is die gesin gedwing om die Lutherse geloof aan te neem, en Gustav het die Christelike doop ontvang.
Op 1 Januarie 1834 het Schwabe 'n vennoot van Boustead and Company geword, 'n handelsmaatskappy met belange in Singapoer en Suidoos-Asië, en die onderneming is hernoem tot Boustead, Schwabe and Company. Schwabe was veertien jaar lank by dié maatskappy betrokke. In 1838 het hy hom in Liverpool gevestig en met Edward Little 'n vennootskap in 'n onderneming van kommissie-agente begin. Little is in die volgende jaar oorlede en het sy huis en boedel blykbaar aan Schwabe bemaak.
Loopbaan
wysigIn Mei 1842 het Schwabe met Helen Dugdale getrou, 'n boorling van die Wirral-skiereiland in Noordwes-Engeland en dogter van John Dugdale, 'n sakeman met belange in Liverpool en Manchester. Schwabe het vervolgens in 'n vennootskap met sy skoonvader, Benjamin Rutter, en Adam Sykes getree om die handelsfirma Sykes, Schwabe & Co. te stig. Hierdie vennootskap is op 31 Desember 1853 ontbind.
In die 1840's het Schwabe 'n junior vennoot by die Liverpool-gebaseerde redery John Bibby & Sons geword. In dieselfde tydperk het Schwabe ook met Edward Harland ontmoet wat destyds sy beroepsopleiding by Robert Stephenson and Company in Newcastle upon Tyne ontvang het. Schwabe het aan Harland 'n aanstelling by J. & G. Thompson besorg, 'n mariene ingenieursfirma wat skepe vir John Bibby & Sons gebou het.
Gustav Wilhelm Wolff, Schwabe se neef wat later in 'n vennootskap met Harland sou tree, het Hamburg in 1849 verlaat om met Schwabe in Liverpool saam te woon. In 1858 het Schwabe Edward Harland finansieel ondersteun sodat hy Robert Hickson se skeepswerf op Queen's Island in Belfast kon oorneem.
Saam met Thomas Henry Ismay het Schwabe in 1867 die White Star Line-redery gekoop nadat dit bankrot moes speel. Toe hulle in 1869 saam biljard gespeel het, het Gustav Schwabe 'n sake-ooreenkoms met Thomas Henry Ismay gesluit waarvolgens hy White Star Line van kapitaal sou voorsien mits hulle hul skepe deur Harland en Wolff laat bou. Schwabe het Ismay daarnaas oorreed om met die Cunard-redery op Noord-Atlantiese passasiersroetes mee te ding. 'n Ander reder, wat deur Schwabe finansieel ondersteun is, was Albert Ballin, besturende direkteur van die Duitse HAPAG-redery.
Latere lewe
wysig
In Oktober 1886 het Schwabe 128 skilderye aan die Kunsthalle Hamburg, 'n kunsmuseum in sy geboortestad Hamburg, geskenk. Hamburg het nog in dieselfde jaar ereburgerskap aan hom toegeken.[1] Aangesien die museumsgebou destyds te klein was om al sy skilderye te huisves, het Schwabe ook 120 000 mark vir die uitbreiding van die Kunsthalle bygedra. Twee jaar later is 'n borsbeeld van Schwabe in Hamburg onthul.
Schwabe het in sy latere lewe begin om minder tyd aan sy sakebelange in die tekstiel- en skeepsboubedryf te spandeer en meer tyd in sy huis in Londen deurgebring. In 1893 het hy afgetree.
Op 10 Januarie 1897 is Gustav Schwabe in sy huis in 19 Kensington Palace Gardens, Londen oorlede. Aangesien hy geen kinders agtergelaat het nie, is sy boedel onder sy niggies en newe verdeel.