HAPAG
Die Hamburg-Amerikanische Packetfahrt-Actien-Gesellschaft (HAPAG, dikwels ook Hamburg-Amerika Linie of kort Hapag genoem) was die eerste aandele-redery in Hamburg, Duitsland wat op 27 Mei 1847 gestig is.
| Hamburg-Amerikanische Packetfahrt-Actien-Gesellschaft HAPAG | |
 | |
| Tipe | Vroeëre aandelemaatskappy |
|---|---|
| Gestig | 27 Mei 1847 |
| Hoofkantoor | Hamburg,, Duitsland |
| Sleutelpersone | Adolph Godeffroy (besturende direkteur, 1847-1880) Albert Ballin (besturende direkteur, 1899-1918) |
| Gebied bedien | Vervoer van emigrante op die Noord-Atlantiese roete, vragvervoer |
| Industrie | Skeepvaartlyne |
| Slagspreuk | Mein Feld ist die Welt! |
| Ontbind | 1 September 1970 (samesmelting met Norddeutscher Lloyd) |
Die destydse 33 aandeelhouers het Adolph Godeffroy, 'n Hamburgse reder, as besturende direkteur aangewys. HAPAG se doelwit was om 'n gereelde verbinding tussen Hamburg en Noord-Amerika met seilskepe onder die Hamburgse vlag aan te bied. Vanaf 1856 is stoomskepe op die Noord-Atlantiese roete gebruik.
HAPAG het hom van die begin af op die winsgewende vervoer van emigrante na Noord-Amerika toegespits, en danksy die massaemigrasie van honderdduisende Europeërs het HAPAG tot die wêreld se grootste redery gegroei. Sy netwerk het hawens dwarsoor die wêreld omspan. Aanvanklik was Bremen die belangrikste Duitse seehawe vir emigranteskepe. Hamburg het die verskeping van emigrante vanaf 1847 bevorder, en reeds dertien jaar later het dit volgens passasiersgetalle by Bremen verbygesteek. 'n Gemiddeld van 25 000 emigrante het jaarliks hul seereis na Noord-Amerika in die Hamburgse hawe begin.
Ná 123 jaar as selfstandige redery het HAPAG op 1 September 1970 met die Bremense Norddeutscher Lloyd saamgesmelt om die nuwe aandelemaatskappy Hapag-Lloyd AG te vorm.