H.J.L. Douwes

Herman Johan Ludolph Douwes, beter bekend as H.J.L. Douwes, (1898–?) was ’n Afrikaanse dramaturg en kunstenaar.

Lewe en werk

Die Bloemfonteinse Normaalkollege, 1907.

Douwes is op 13 Augustus 1898 in Claremont in Kaapstad gebore as enigste kind van Johannes Ludolf Douwes en Helen Raubenheimer. Sy vader was ’n skilder en argitek oorspronklik van Zutphen in Nederland en hy was verantwoordelik vir die ontwerp van verskeie openbare geboue in Kaapstad. Die dood van sy vader ’n jaar na sy geboorte noop sy weduweemoeder om later na die familieplaas in die distrik George te verhuis. As kind hou hy homself besig met kuns en teken verskeie figuurtjies en diertjies. Tot 1909 word hy op die plaas groot, waarna hy vir die eerste keer op elfjarige ouderdom na die kosskool op George gestuur word. Hier “spring” hy verskeie standerds en matrikuleer in 1918. Hy gaan hou skool in die Vrystaat, maar skryf hom na drie jaar as student aan die Bloemfonteinse Normaalkollege, waar hy ’n Onderwyskursus en ’n Kunskursus volg en in die eerste klas met lof slaag. In 1924 begin hy in Transvaal skoolhou waar hy opleiding aan die Kunsskool van die Johannesburgse Tegniese Kollege ontvang, terwyl hy sy daarna B.A.-studie in die Skone Kunste deeltyds voortsit aan die Universiteit van Suid-Afrika. Later word hy kunsonderwyser by die Hoërskool Linden in Johannesburg. Hy was ook ’n knap skilder, wat verskeie skilderye maak, onder andere ’n lewensgrootte portretstudie van generaal J.J. Pienaar, voormalige Administrateur van Transvaal. Gedurende 1933 bied hy tentoonstellings in Hamburg en Berlyn aan. Hy was getroud met Hester Marthina Raubenheimer en die egpaar het twee kinders gehad.

Skryfwerk

As onderwyser skryf hy “Ses feëspele vir ons kleinspan”, wat toneelstukkies is vir opvoering deur laerskole. Hierdie is die eerste bundel wat deur Voortrekkerpers gedruk word. Van hierdie spele word op radio uitgesaai en die spel “Windvoël” in hierdie bundel word deur die Unie Onderwysdepartement verfilm, onder regie van die skrywer. Die drama “Elsie” het die subtitel “Saam met die Voortrekkers na die Noorde” en behandel die lotgevalle wat die Voortrekkers te beurt val.

Publikasies

Jaar	Publikasies
1937	Ses feëspele vir ons kleinspan
1949	Elsie

Bronnelys 

Boeke

• Kannemeyer, J.C.: “Geskiedenis van die Afrikaanse literatuur 2” Academica, Pretoria, Kaapstad en Johannesburg. Eerste uitgawe. Eerste druk. 1983
• Brosjure van die Republiekfees 1966 • Kunsuitstallings in amptelike opdrag gereël deur die Suid-Afrikaanse Kunsvereniging

Internet

• Geni: http://www.geni.com/people/Herman-Douwes/6000000009301834375

Ongepubliseerde dokumente

• Douwes, H.J.L. “Korte lewenskets”. Nasionale Afrikaanse Letterkundige Museum en Navorsingsentrum (NALN). Bloemfontein.