Hans van Oort

Johannes (Hans) van Oort (* 4 September 1949) is Professor in Patristiek en Gnostiese Studies aan die Radboud Universiteit, Nijmegen, en aan die Universiteit van Pretoria, Suid-Afrika.

Hans van Oort
Geboortenaam	Johannes van Oort
Gebore	4 September 1949
Nasionaliteit	Nederland
Vakgebied	patristiek en gnostiek
Instelling(s)	Radboud Universiteit Nijmegen en Universiteit van Pretoria

Hy is veral bekend vir sy spesialiteit in die bestudering van die Kerkvader Augustinus, die gnostiese wêreldgodsdiens van Mani (Manigeïsme), en die Evangelie van Judas. In 2006 tree hy vir National Geographic as aanbieder van ’n program vir die Nederlands-sprekende wêreld op wat handel oor die ontdekking van hierdie gnostiese “evangelie.”

Biografie

Van Oort studeer Latyn en Grieks, en daarna Teologie, aan die Universiteit van Utrecht. Hier promoveer hy ook met hoogste lof vir sy tesis “Jeruzalem en Babylon: Een onderzoek van Augustinus’ De stad van God en de bronnen van zijn leer van de twee steden (rijken)” (1986), waarvan in 1995 ’n vierde Nederlandse uitgawe die lig sien. Die Engelse weergawe verskyn in 1991 as Jerusalem and Babylon: A Study of Augustine’s City of God and the Sources of his Doctrine of the Two Cities, en is in 2013 as sagteband weergawe herdruk deur Brill Academic Publishers, Leiden-Boston.

Van Oort is sedert 1972 by hoër onderwys betrokke: By Utrecht Universiteit is hy van 1980–1983 navorsingsgenoot in Kerkgeskiedenis, en van 1983–1987 dosent in Godsdienstige Pedagogiek en Didaktiek. Gedurende hierdie tyd tree hy ook op as navorser vir die Nederlandse Navorsingsgenootskap ZWO (nou NOW), en as redakteur van ’n onderwysblad. In 1987 word hy aangestel as Senior Navorsingsgenoot van die Koninklijke Nederlandse Akademie van Wetenschappen (KNAW) vir navorsing op die gebied van Augustinus en die bronne vir sy teologie. Op sy aanstelling in 1992 as senior dosent in Kerk- en Dogmageskiedenis volg sy aanstelling in 1999 as buitengewonde professor in Gnostiese Studies by Nijmegen Universiteit, waar hy voltydse professor word in 2000.

Gnostiese Studies en Augustinus

Van Oort se bestudering van Augustinus en die bronne van sy teologie het hom tegelykertyd ’n spesialis gemaak op die gebied van Gnostiese Studies, in besonder die gnostiese wêreldkerk van Mani (216-276/7). As sulks dien hy as lid van die International Association of Manichaean Studies, eers as sekretaris (1993 tot 2001) en later as voorsitter (2001–2009). In hierdie hoedanigheid vorm hy deel van 'n groep academici wat inisiatief neem om die vele Manicheënse bronne – wat op hierdie stadium wêreldwyd versprei was – te publiseer as deel van die Corpus Fontium Manichaeorum, ’n projek wat wye steun geniet van beide wetenskaplike genootskappe en UNESCO.

Van Oort is lid van ’n wye verskeidenheid internasionale organisasies en wetenskaplike genootskappe, en is in 1998–1999 besoekende professor in Oxford, London en Warwick, in diens van die Britse Akademie.

’n Indrukwekkende aantal boektitels (25) verskyn uit Van Oort se pen, meestal rondom die onderwerp van Augustinus en die gnostiese wêreldkerk van Mani. ’n Geselekteerde bibliografie kan gevind word in ’n Feesbundel van 800 bladsye wat in 2011 aan hom opgedra word: In Search of Truth: Augustine, Manichaeism and other Gnosticism: Studies for Johannes van Oort at Sixty (Leiden-Boston: Brill, 2011).

Van Oort dien tans, onder andere, as besturende direkteur van Brill se Nag Hammadi and Manichaean Studies, as mede-redakteur (en boekresensie redakteur) van die tydskrif in Patristiek Vigiliae Christianae: A Review of Early Christian Life and Language, as mede-redakteur van die Corpus Fontium Manichaeorum (Brepols, Turnhout), en as redakteur van die reeks Studies of the [German] Patristic Association / Studien der Patristischen Arbeitsgemeinschaft (Peeters, Leuven).

Van Oort se poëtiese vertaling van fragmente van Augustinus se Confessiones (Bij God lééft ons goed: Bidden met Augustinus [Leiden: Groen, 1993]) is deur die Utrechtse komponis Theo Teunissen getoonset, en uitgevoer deur genote van die Utrecht Convervatorium. Die kerkmusikus Leo Köhlenberg het ook Van Oort se vertaling van die Evangelie van Judas verwerk as die Oratorium Iskarioth.

Van Oort se mees onlangse publikasie is die geredigeerde volume: Augustine and Manichaean Christianity. Selected Papers from the First South African Conference on Augustine of Hippo, University of Pretoria, 24-26 April 2012 (Nag Hammadi and Manichaean Studies 83; Leiden-Boston: Brill, 2013).

Bronne, notas en/of verwysings

• Brill: Vigiliae Christianae
• Brill: Nag Hammadi and Manichaean Studies
• Brill: Supplements to Vigiliae Christianae
• Brepols: Corpus Fontium Manichaeorum
• International Association of Manichaean Studies
• Peeters: Studien der Patristischen Arbeitsgemeinschaft

Eksterne skakels

• Radboud University Nijmegen Geargiveer 24 September 2015 op Wayback Machine
• Virtual International Authority File (VIAF): 85420759