Helmut Jahn

Helmut Jahn (* 4 Januarie 1940 in Zirndorf naby Neurenberg - 8 Mei, 2021) was 'n Duitse argitek wat sedert in 1966 in Chicago woon. Jahn het bekendheid verwerf met opspraakwekkende projekte soos die Sony Center in Berlyn, die Messeturm in Frankfurt am Main, One Liberty Place in Philadelphia en die Suvarnabhumi- internasionale lughawe in Bangkok, Thailand.

Helmut Jahn
Gebore	4 Januarie 1940 Zirndorf naby Neurenberg, Beiere
Sterf	8 Mei 2021 (op 81)
Nasionaliteit	Duitsland  Verenigde State
Alma mater	Technische Hochschule in München Illinois Institute of Technology in Chicago
Beroep	Argitek

In die 1980's het Jahn projekte in twee Suid-Afrikaanse metropole, Johannesburg en Durban, uitgevoer.

Lewe

Helmut Jahn: Sony Center, Berlyn

Helmut Jahn het sy akademiese opleiding as argitek aan die Technische Hochschule in München gevolg en hom daarna in die Verenigde State gevestig waar hy een jaar lank verdere opleiding aan die Illinois Institute of Technology in Chicago ontvang het - met die befaamde Bauhaus-argitek Ludwig Mies van der Rohe as sy hoofdosent.

In 1967 het Jahn tot die ateljee van C.F. Murphy Associates toegetree waar hy ses jaar later 'n vennoot en direkteur van die ontwerpafdeling geword het. In 1981 is die ateljee hernoem tot Murphy/Jahn. Die onderneming het gedurende die 1960's sommige van Chicago se mees gesofistikeerde geboue ontwerp en verwesenlik waarby gebruik gemaak is van Mies van der Rohe se geometriese vormtaal. In 1983 is die erelidmaatskap van die Vereniging van Duitse Argitekte (Bund deutscher Architekten, BDA) aan hom toegeken.

Naas sy werksaamhede in die VSA spits Jahn hom veral op projekte in Duitsland toe. Nadat van sy ontwerpe vir projekte in die Arabiese Golfstate nie verwesenlik kon word nie, het Jahn hom vanaf omstreeks 2005 tot die Sjinese mark gewend wat deur 'n bougolf geraak is. So het Murphy/Jahn tans 'n kantoor in Berlyn, Chicago en Sjanghai.

Vir sy latere ontwerpe het Jahn begin wegbeweeg van suiwer modernistiese boukuns en hom tot kreatiewe rasionalisme gewend - 'n argitektoniese stroming wat 'n meer buigbare benadering tot ontwerp behels het. Volgens The Illustrated Encyclopedia of Architects and Architecture het Jahn met sy ontwerpe 'n simboliese argitektoniese kode geskep wat sowel by professionele argitekte asook die breë publiek aanklank vind en deur albei maklik ontsyfer kan word. Kenmerkend is Jahn se buigbare en verreikende vormtaal waarmee hy die "kontekstuele verhouding van 'n gebou" beskryf.

Jahn was met 'n Amerikaanse vrou getroud. Uit die huwelik is een seun gebore, wat dubbelburgerskap het.

Eksterne skakels

• Wikimedia Commons het meer media in die kategorie Helmut Jahn.