Hoërskool Diamantveld

Die Hoërskool Diamantveld is in 1935 gestig as die eerste Afrikaanse hoërskool in Kimberley. Drie jaar later is sy naamgenoot, die Laerskool Diamantveld, as die eerste Afrikaanse laerskool gestig.

Hoërskool Diamantveld
Leuse	A Posse ad Esse (Van 'n moontlikheid tot 'n werklikheid)
Gestig	28 Januarie 1935
Tipe	Staatskool
Hoof	Leon Victor
Grade	8-12
Adres	Voortrekkerstraat 2 Kimberley 8301
Stad	Kimberley
Provinsie	Noord-Kaap
Land	Suid-Afrika
Koshuis(e)	Huis JP Auret Huis Dugmore
Skoolkoerant	Aitsa
Webblad	www.diamantveld.co.za

Die skool het sedert sy stigting landwyd groot aansien opgebou met prestasies op talle terreine. Dit word as Kimberley se mees vooraanstaande skool beskou.

Dr. JF O'Grady (1935–1960) is as eerste skoolhoof aangestel. Hy is gevolg deur dr. CF Cerff (1962–1969), Hannes Spangenberg (1969–1974), MG Heyns (1975–1979), Jan Auret (1980–1996), en Johan du Toit (1997–2012). Mareth Hugo is in September 2013 as hoof aangestel – die eerste vrou in die pos. In November 2018, is Leon Victor aangestel as die 8ste skoolhoof van Diamantveld.

Geboue en terrein

Die skool is aanvanklik in die koshuis van die ou Kimberley Teachers Training College, wat in 1930 gesluit is, gehuisves. Die grondvloer is vir onderrig gebruik, en die koshuisleerlinge is op die eerste verdieping gehuisves.

Na die sluiting van die kollege is die kollegegebou deur 'n Engelse laerskool, die latere Laerskool Belgravia, oorgeneem. Die twee geboue was weerskante van wat toe Skoolstraat was.

Die toename in leerlingtal by Diamantveld het spoedig 'n groter skoolgebou genoodsaak. 'n Nuwe gebou vir die skool is oorweeg, maar dr. O'Grady het sy oog op die laerskoolgebou oorkant die straat gehad. Na onderhandelinge is besluit dat 'n nuwe gebou elders vir die laerskool opgerig sou word, en dat Diamantveld na die ou kollegegebou sou verhuis. Die koshuisgebou is daarna volledig as skoolkoshuis gebruik.

Uitbreidings

Oor die jare heen is die skoolgebou telkens uitgebrei. Daar is egter deurgaans by die oorspronklike boustyl gehou, sodat dit vandag moeilik met die blote oog bepaalbaar is watter dele wanneer aangebou is.

'n Nuwe koshuisgebou is in 1970 langs die ou koshuisgebou opgerig. Die ou gebou is ontruim. Die gebou is ondanks versoeke deur die skool nie deur die onderwysdepartement in stand gehou nie. In 1977 is begin om die gebou te restoureer met die oog daarop om dit as klaskamers te benut. Dit het egter geblyk dat dit nie prakties uitvoerbaar was nie, en die gebou is gesloop.

Skoolstraat is in 1938 na Voortrekkerstraat herdoop. In 2009 het die straat deel van die skoolterrein geword. Op 23 Februarie 1968 is die nuwe skoolsaal ingewy. Op Stigtersdag, 28 Januarie 2007, is die skoolsaal na wyle dr. S.M. Cerff, die tweede skoolhoof, vernoem. Sedertdien is die oorspronklike skoolsaal, wat deel van die hoofgebou is, op Stigtersdag, 28 Januarie 2008, na wyle mnr. J.P. Spangenberg, die derde skoolhoof, vernoem. Op Stigtersdag, 28 Januarie 2010, is die hoofgebou na die eerste skoolhoof, J.F. O'Grady, vernoem.

Die saal in die Sport- en Kultuursentrum wat op 29 Augustus 2009 in gebruik geneem is, is na André Markgraaff, oud-leerling (1970 tot 1974) en een van die donateurs, vernoem.

Akademie

Die skool lewer telkens talle presteerders op met die matriekeindeindeksamen. Leerlinge van die skool neem elke jaar minstens vier of vyf plekke op die top20-lys in. Die toppresteerder in die Noord-Kaap was al verskeie kere van Diamantveld.

In 2013 is die skool aangewys as die beste wiskunde- (tweede agtereenvolgende jaar) sowel as die beste wetenskapskool (vierde agtereenvolgende jaar) in die Noord-Kaap.

Diamantveld was die eerste skool in die Noord-Kaap om 'n matriekkandidaat met agt onderskeidings op te lewer (1998). Sedertdien het nog 10 leerlinge die prestasie behaal. In 2006 lewer die skool die eerste matriekleerling in die Noord-Kaap met nege onderskeidings, en in 2010 die eerste matriekleerling met 10 onderskeidings.

Sport

Diamantveld bied 'n verskeidenheid sportsoorte aan. Dit sluit in rugby, krieket, atletiek, netbal, hokkie, tennis, gholf, skaak, pluimbal, sokker en jukskei. Die skool is een van die sterkste sportskole in die Noord-Kaap, en het oor die jare heen talle presteerders, ook op nasionale vlak opgelewer.

Dit is veral op die netbalbaan waar Diamantveld sy buurskole totaal oorskadu, soos blyk daaruit dat die skool se eerste span in 2015 die Kimberley-liga die 28ste keer in 31 jaar gewen het. Die span is ook in 2013 12de op die nasionale ranglys geplaas, die hoogste posisie van enige Noord-Kaapse skool. In die tydperk was die span ook byna elke jaar die Noord-Kaapse kampioenspan, ook in 2015. Die Griekwa-skolespan bestaan feitlik elke jaar grootliks uit spelers van Diamantveld, en die skool het al 'n hele aantal spelers in die nasionale skolespan gehad. Die skool het ook verskeie Springbok/Protea-netbalspelers opgelewer.

Diamantveld presteer ook op die hokkieveld. Die eerste meisiespan is in 2013 20ste op die nasionale ranglys geplaas, die enigste Noord-Kaapse skool in die top 20.

Op die rugbyveld is Diamantveld een van twee skole wat Noord-Kaapse skolerugby oorheers, en word landwyd as 'n rugbykrag beskou.Die eerste span het in 2014 en 2015 die jaarlikse Classic Clash teen sy buurskool, Noord-Kaap, gewen, en het daarmee Griekwas se kampioenspan geword. Die eerste span het in 2015 onder meer teen Grey-kollege gelykop gespeel, en met net 10 punte teen Paarl Boys' High, beskou as die sterkste span in die land in 2015, verloor. Die span is op die ranglys 18de in die land geplaas.

Die eerste span neem jaarliks aan die Wildeklawer-rugbytoernooi deel, waar die land se toprugbyskole kragte meet. Diamantveld was twee keer die gasheer vir die toernooi, wat uit 'n inisiatief van die skool ontstaan het. Die skool is in 2014 en 2015 weer die gasheer.

Die skool lewer jaarliks verskeie spelers vir die Griekwa-Cravenweek-span. In 2015 het die skool 11 verteenwoordigers in die span gehad, verreweg die meeste van enige skool. Benewens talle senior provinsiale spelers het die skool ook drie Springbokke opgelewer. Andrė Markgraaff, oud-Springbokafrigter, is ook 'n oud-leerling.

Die skool het veral sedert die 1980's skoleatletiek in die Noord-Kaap grootliks oorheers. Die Top20-atletiekbyeenkoms, die enigste in die Noord-Kaap waar skole in spanverband met mekaar meeding, is die afgelope 14 jaar tien keer deur Diamantveld gewen (insluitend 2013 en 2014).

Die skool se pluimbalspan het in 2013 die nasionale kampioenskap gewen.

Die meisiestennisspan het in 2014 met toptennisskole soos Oranje Meisieskool, Rhenish Girls High en Bloemhof-meisieskool afgereken.

In elke ander sportsoort wat by Diamantveld aangebied word, word die skool as een van die twee of drie sterkste skole in die Noord-Kaap beskou.

Noemenswaardige alumni

• Karen Muir: Wêreldkampioenswemmer
• Wessel Lightfoot: SA Skole Springbokrugbyspeler
• André Markgraaff: Springbokafrigter
• Christine Markgraaff: Protea-netbalspeler
• Mannetjies Gericke: Springbok-rugbyspeler
• Milize Symington: Lid van nasionale junior swemspan
• Letetia Vorster: Protea-netbalspeler
• Lindy van Niekerk: Nasionale o.19-netbalspan
• Melinda Vos: Protea-hokkiespeler
• Violet Krieg: Springbok-netbalspeler
• Francien Kuit: Springbok-netbalspeler
• Philip van der Merwe:Springbokrugbyspeler
• Dirkie Badenhorst: Springbok-netbalspeler
• Gerhardus Liebenberg: Protea-krieketspeler
• Rudolf Steyn: Protea-krieketspeler
• Magdel Myburgh: Springbok-atleet
• Jannie van Aswegen: Junior Springbok-rugbyspeler (spankaptein)
• Des Terblanche: Wenner van junior gholf-wêreldkampioenskap
• Edwill van Aarde: Radio- en TV-persoonlikheid
• Coenie Burger: Moderator van Algemene Sinode van die NG Kerk
• Fonnie du Plooy: Radio-persoonlikheid
• Pieter Moller: Radio-persoonlikheid
• Christie Hansen: Radio-persoonlikheid
• Emile Minnie: Musikant
• Corné van Zyl: Tweede jongste permanente regter in SA; Verskeie SA titels op Amerikaanse saalperdkampioenskapsbyeenkomste

Bronne

• "'Juffrou was die diamant in Diamantveld-hoërskool'". Netwerk24. Besoek op 22 Julie 2018.
• "Skoletrots soos min". Netwerk24. Besoek op 22 Julie 2018.
• "Diamantveld legend passes away". OFM. Geargiveer vanaf die oorspronklike op 22 Julie 2018. Besoek op 22 Julie 2018.
• "PressReader.com - Connecting People Through News". www.pressreader.com. Besoek op 22 Julie 2018.
• "Schools excel at the International AECOM – SAICE AQUALIBRIUM Schools Water Competition - SAICE". 19 Augustus 2015. Besoek op 22 Julie 2018.
• "Laduma heißt: „Tooor!"". Geargiveer vanaf die oorspronklike op 9 Oktober 2019. Besoek op 22 Julie 2018.
• "'Tepid Torpedo' Karen Muir remembered - IOL Sport". Besoek op 22 Julie 2018.
• "My lewe... 'n Skatkis vol herhinneringe - West Rand Window Newspaper". 4 Junie 2018. Geargiveer vanaf die oorspronklike op 17 Junie 2018. Besoek op 22 Julie 2018.
• "Two ex Boks die". Besoek op 22 Julie 2018.
• "SA's young scientists to compete in international pre-college science competition". www.esi-africa.com. Besoek op 22 Julie 2018.
• "Teen refs get Currie Cup taste". Besoek op 22 Julie 2018.
• "Hoërskool Diamantveld mega-trots op slimkop". OFM. Besoek op 22 Julie 2018.