Hotel Oekraïne

Die Hotel Oekraïne (Russies: Ukraina) is ’n vyfsterhotel in die middestad van Moskou, op ’n draai van die Moskwarivier, onder bestuur van Radisson Hospitality. Aanvanklik is dit as Radisson Royal Hotel Moscow bedryf. Sedert Januarie 2019 maak die hotel deel uit van Radisson Hospitality se premium-handelsmerk Radisson Collection.

Geskiedenis

Die hotel is as die laaste van die sewe neoklassieke wolkekrabbers, waarna as Sewe Susters verwys word, deur Josef Stalin laat bou en ter geleentheid van die 300ste jubileum van Rusland en Oekraïne in 'n gemeenskaplike staat Ukraina genoem.^[1] Dit is deur twee van die Sowjetunie se leidende deskundiges vir staalraamkonstruksie-wolkekrabbers, Arkadi Mordwinof en Wjatsjeslaf Oltarzjefski, ontwerp as die tweede hoogste van Stalin se Moskouse wolkekrabbers: dit is 198 m hoog en het 34 verdiepings^[2]. Dit was sedert sy konstruksie die hoogste hotel in die wêreld tot in 1976, toe die Westin Peachtree Plaza Hotel in Atlanta, Georgia in die VSA, geopen het.

Die Hotel Oekraïne het op 25 Mei 1957 geopen - met 1 026 kamers wat hoofsaaklik op buitelandse gaste gemik was.^[3] Westerse rock-musici, wat ter geleentheid van die Moscow Music Peace Festival in 1989 in die hotel oornag het, was allesbehalwe gaande oor sy gerieflikhede. Die kamers was groot, maar nouliks gemeubileer, en baie van die musieksterre het - net soos gewone Sowjet-burgers - die werklike waarde van toiletpapier of "wit goud" leer waardeer as hulle dit toevallig in hande kon kry. Sommige musikante moes hul kamers met kakkerlakke deel.^[4]

In 2007 is die hotel gesluit vir ’n algehele restourasie. In 2009 het die eienaars ’n kontrak met die Rezidor-hotelgroep (tans Radisson Hospitality) geteken vir die bestuur van die hotel as die Radisson Royal Hotel Moscow. Vir sekere doeleindes behou die hotel egter sy ou naam.

Dit het op 28 April 2010 heropen met onder meer 505 slaapkamers, 38 woonstelle, 5 restaurante (intussen is daar 19 eetplekke en kroeë, waarvan sommige oorkant die straat geleë is), ’n konferensiesentrum, biblioteek, spa en ’n vloot rivierseiljagte.

Sowat 1 200 oorspronklike skilderye deur die mees vooraanstaande Russiese kunstenaars van die eerste helfte van die 20ste eeu is in die hotel te sien.