Maak hoofkeuseskerm oop
Brasao de Aviz.PNG

Die Huis van Aviz (moderne Portugese spelling: Avis [ɐˈviʃ]) was die tweede koningsdinastie wat tussen 1383 en 1580 oor Portugal geregeer het. Sy naam is afgelei van die nedersetting Avis, setel van die gelyknamige ridderorde. Die orde se grootmeester, Johannes I (Portugees: Dom João I), was die grondlegger van die dinastie. Gedurende die regentskap van die Huis van Aviz het Portugal tot die wêreld se leidende seevaardersnasie ontwikkel.

Gedurende die politieke krisis tussen 1383 en 1385, die sogenaamde Interregnum, was die Portugese koningstroon vakant. 'n Vergadering van die koninkryk se state in Coimbra, die sogenaamde Cortes de Coimbra, het Johannes I as grootmeester van die monastiese Ridderorde van Aviz as nuwe koning van Portugal uitgeroep. Johannes is uit 'n buite-egtelike verhouding tussen koning Pieter I (Dom Pedro I) en Dona Teresa Lourenço gebore en was die halfbroer van Ferdinand I (Dom Fernando I), die laaste koning uit die Portugese Huis van Boergondië. Derhalwe word na die Huis van Aviz soms ook verwys as 'n "onegte Boergondiese dinastie".[1]

Die Huis van Aviz het tot en met 1580 oor Portugal geregeer. Met die Portugese troonopvolgingskrisis van dieselfde jaar het Filips II van Spanje die Portugese kroon geërf.

VerwysingsWysig

  1. Helmut Aschbacher: Algarve. 4de uitgawe. Pforzheim: Goldstadtverlag 1981, bl. 16