Isidore Cohen

Isidore Cohen (16 Desember 1922, Brooklyn, New York – 23 Junie 2005, Bronx, New York) was 'n bekende kamermusikant en violis, sowel as 'n voormalige lid van die Juilliard Strykkwartet en Beaux Arts Trio.

Cohen het op sesjarige ouderdom die viool begin studeer en aan die High School of Music and Art in Manhattan gegradueer, alhoewel dit sy bedoeling was om 'n dokter te word. Sy pre-mediese studies aan die Brooklyn kollege is onderbreek omdat hy in die Amerikaanse Leër in Europa tydens die Tweede Wêreldoorlog geveg het. Van toe af het sy loopbaanfokus verander.

Nadat hy sy terugkeer gemaak het na die burgerlike lewe, het hy 'n student van Ivan Galamian aan die Juilliard-skool geword. Galamian het sy bedenkinge gehad oor die aanvaarding van 'n 24-jarige student, maar vir Cohen as oorlogsveteraan uithelp. Van daar af het sy lewe as musikant gedy, en selfs die aandag van Igor Stravinski getrek met sy uitvoering van Stravinski se L'Histoire du Soldat. Hy het veral bekend geword vir sy beklemtoning van die werke van moderne komponiste, en het veral nou saamgewerk aan baie stukke saam met John Cage.

Cohen het vanaf die vyftigerjare gedien as konsertmeester van orkeste tydens die Casals-feeste in Frankryk en Puerto Rico, benewens verskeie ensembles in New York, insluitend die Columbia simfonieorkes. Hy was gereeld konsertmeester vir Leonard Bernstein se uitgesaaide konserte vir jongmense. Sy opvoering as konsertmeester (onder Stravinski se leierskap) van Stravinski se "Die rite van Lente" is een van die opnames op die goue plaat wat deur die voyager-ruimtetuie gedra word. In 1952 het Alexander Schneider vir Cohen uitgenooi om by die Schneider Kwartet as tweede violis aan te sluit. Tydens Cohen se termyn het die Schneider-kwartet die eerste volledige stel strykkwartette van Joseph Haydn opgeneem.

In die begin van 1958 het Cohen tweede violis van die Juilliard Strykkwartet geword, welke pos hy byna 'n dekade beklee het. As lid van die kwartet het Cohen ook van 1958 tot 1966 gedien op die fakulteit op die Juilliard-skool.

In 1968, na die uittrede van die violis Daniel Guilet is hy oorreed deur die pianis Menahem Pressler en die tjellis Bernard Greenhouse om by die Beaux Arts Trio aan te sluit. Teen die middel van die sewentigerjare het hulle getoer en opnames gemaak as die wêreld se bekendste klaviertrio. Gedurende Cohen se tyd met die trio is tientalle opnames vrygestel, waaronder die volledige klaviertrio's van Beethoven, Haydn, Mozart, Dvořák, Brahms, asook werke van Chopin, Pjotr Tsjaikofski, Sergei Rachmaninoff, Charles Ives, en Dmitri Sjostakowitsj. Na drie en twintig jaar as deel van die kwartet is hy as violis opgevolg deur Ida Kavafian.

As onderwyser was Cohen benewens die Juilliard-skool ook betrokke by die fakulteite van talle instellings en feeste, waaronder die Aspen Musiekfees, die Curtis Institute of Music, Princeton-universiteit, SUNY in Stony Brook en die Manhattan Musiekskool. Sy langste verbintenis was met die Marlboro Musiekfees waar hy, beginnende in 1966, vir byna veertig jaar lank klasgegee het.