Jan Marais-natuurreservaat

Die Jan Marais-natuurreservaat van 23 ha in die sentrale dorpsgebied van Stellenbosch het 'n opvoedkundige doel en dien ook as 'n ontspanningsplek vir die publiek.

Uitsig oor die Jan Marais-natuurreservaat in Stellenbosch met die pieke van die Jonkershoekvallei op die agtergrond.

Geskiedenis

In 1915 het Johannes Henoch Marais geld in sy testament aan die munisipaliteit van die dorp nagelaat om 'n veldblompark tot stand te bring.

Ligging

Cluver- en Maraisstraat vorm die skeiding tussen die reservaat en die kampus van die Universiteit Stellenbosch aan die westekant. Jannaschstraat skei dit aan die oostekant van die Hoërskool Stellenbosch en die Laerskool Stellenbosch.

Flora

In die reservaat is die enigste oorblywende voorbeeld van natuurlike Bolandgranietfynbos en Swartlandskalierenosterveld. Daar kom meer as 150 plantsoorte, insluitende 'n indrukwekkende versameling proteaceae, in die reservaat voor. Blombeddings is gevestig waar spoorsalie en ander skaduplante ten toon gestel word.

Fauna

Die reservaat bied 'n veilige tuiste aan klein soogdiere, voëls en reptiele in 'n stedelike gebied. Verskeie muis- en skilpadspesies, die vlakhaas, die Kaapse grysbok en die grysmuishond is al waargeneem.

Ontspanning en kuns

Weens sy ligging net oos van groot universiteitskoshuise is die reservaat 'n belangrike ontspanningsgebied. Dit word benut vir draf, fietsry, stap en piekniek op die groot grasperke. Daar is ook 'n groot skaakbord en 'n labirint aangelê. Verskeie kunswerke word in die reservaat vertoon.

Navorsing

Die reservaat word deur studente as 'n terrein vir navorsing in plant-, voël-, insekte- en grondkunde gebruik.