Jaroslafhof
Jaroslafhof (Russies: Ярославово Дворище, Jaroslawowo Dworisjtsje) was die tuiste van die prinse wat oor Weliki Nowgorod in Rusland regeer het. Vandag is dit rofweg die gebied om die Handelsmarkplein, die Sint Nikolaas-katedraal en die Kerk van die Mirredraende Vrou. Die Handelsmarkplein, wat in die 16de en 17de eeu aansienlik gerestoureer en verander is, is al wat van die paleis self oorgebly het.[1] Die prins het nog ’n woning, Rjoerikowo Gorodisjtsje, buite die stad gehad.
Die paleis is genoem na Jaroslaf die Wyse wat die paleis tydens sy bewind (988-1015) laat bou het. Die Nowgorod-wetsje (vergadering) het dikwels voor die paleis vergader en verskeie heidense towenaars is in 1224 daar op die brandstapel tereggestel.
Nadat die inwoners van Nowgorod hul destydse prins in 1136 van die troon gesit het, het hulle prinse genooi om oor hulle te regeer en dié prinse mag nie grond in Nowgorod besit het nie. Die prinse het daarna nie meer in Jaroslafhof gewoon nie, maar in Rjoerikowo Gorodisjtsje.[2]
Verwysings
wysig- ↑ A.I. Semjonof, Jaroslawowo Dworisjtsje i Torg (Nowgorod: gazeta Nowgorodskaja Prawda, 1958).
- ↑ Janet Martin, Medieval Russia 980-1584 (Cambridge: Cambridge University Press, 1995)'.
| Wikimedia Commons bevat media in verband met Jaroslafhof. |