Johan II van Portugal

(Aangestuur vanaf Johannes II van Portugal)

Johan II (in Portugees, João II; Lissabon, 3 Maart 1455 – Alvor, 25 Oktober 1495) was van 1481 tot sy dood in 1495 die koning van Portugal. Onder sy heerskappy is die mag van die Portugese troon hervestig, nuwe lewe in die ekonomie geblaas en die verkenning van Afrika en die Ooste voortgesit.

Johan II van Portugal
Koning van Portugal en die Algarves
Johan II van Portugal
Dinastie Huis van Aviz
Bewind 11 November15 November 1477
28 Augustus 148125 Oktober 1495
Kroning 31 Augustus 1481
Volle naam João II
Gebore 3 Maart 1455
São Jorge-kasteel, Lissabon, Portugal
Gesterf 25 Oktober 1495 (op 40)
Alvor, Algarve
Klooster van Batalha
Voorganger Alfons V
Opvolger Alfons V
Manuel I
Gade Eleanor van Viseu
Kinders Alfons, Prins van Portugal
onder andere
Vader Alfons V
Moeder Isabella van Coimbra

Biografie wysig

Johan was die seun van Alfons V van Portugal en Isabella van Coimbra. Sy eerste opdrag was om die mag van die adel in te perk en hy skroom nie om bloed in die proses te vergiet nie.

Op buitelandse gebied het hy kolonisasie voortgesit. Sodoende is die vesting Elmina in 1482 aan die Goudkus gestig. Dit het toegang verleen tot die goud van Wes-Afrika, wat Portugal se inkomste sou verdubbel. In 1483 bereik sy gesant Diogo Cam die Kongo.

In 1484 verwerp Portugal die idee van Christophorus Columbus om Indië vanaf die weste te bereik, omdat dit as onsinnig beskou is. Hiermee is 'n lang debat met Spanje begin, wat in 1494 op die Verdrag van Tordesillas uitgeloop het. Die verdrag het die (nog grotendeels onontdekte) wêreld gelykop tussen die Spanjaarde en die Portugese verdeel. 'n Noord-suid-lyn is 1 770 km wes van Kaap Verde getrek. Die land oos hiervan sou aan Portugal behoort, terwyl die land wes hiervan aan Spanje toegeken is.

Een van Johan II se belangrikste prestasies was Bartolomeu Dias se reis na die Kaap die Goeie Hoop in 1487/88. Die rykdom van Indië was nou binne bereik, en Vasco da Gama het vervolgens koers ingeslaan na Indië.

Johan II het in 1495 onder verdagte omstandighede gesterf (vermoede aan vergiftiging) en is deur Manuel ('n neef van hom) opgevolg.

Huwelik wysig

Johan was getroud met Eleonora en was die vader van:

  • Alfons (1475–1491), getroud met Elisabeth, die dogter van Ferdinand II van Aragón
  • Johan (1483-1483).

Verder het hy 2 buite-egtelike kinders gehad: Jorge (by Ana de Mendoça) en Brites (by Brites Anes). Nadat sy seun Alfons oorlede is, het Johan II probeer om Jorge 'n wettige nakomeling te maak, maar dit het misluk.