John Updike
John Hoyer Updike (1932–2009) was 'n Amerikaanse skrywer van kortverhale, romans en gedigte wat deur 'n eietydse tematiek en sorgvuldige styl ’n wye leserspubliek het. John Hoyer Updike is op 18 Maart 1932 in Shillington, Pennsilvanië, gebore.
John Updike | |
|---|---|
 John Updike in 1989 | |
| Gebore | John Hoyer Updike 18 Maart 1932 Reading, Pennsilvanië |
| Sterf | 27 Januarie 2009 (op 76) Danvers, Massachusetts |
| Nasionaliteit |  Verenigde State |
| Beroep | Romanskrywer, kortverhaalskrywer, digter, literêre kritikus, kunstenaar |
| Bekend vir | Rabbit Angstrom-romans Henry Bech-stories The Witches of Eastwick |
| Ouer(s) | Linda Grace (née Hoyer) en Wesley Russell Updike |
| Handtekening | |
 | |
Hy het aan die Universiteit van Harvard en die Ruskin School of Fine Art and Drawing in Oxford gestudeer. By Harvard was hy verbonde aan die satiriese universiteitsblad Harvard Lampoon. Van 1955 tot 1957 was hy verbonde aan The New Yorker, wat van sy verhale essays en gedigte gepubliseer het. Vanaf 1958 het hy hom in Massachusetts afgesonder om hom voltyds op skryfwerk toe te lê. In 1958 het Updike met die digbundel The carpentered hen and other tame creatures gedebuteer en 'n jaar later het 'n bundel kortverhale, The same door, verskyn, asook sy eerste roman, The poorhouse faire, wat oor bejaardes in 'n armhuis se opstand teen ’n nuwe direkteur handel.
In 1960 het sy briljante roman Rabbit, run verskyn. Die werk handel oor die onvolwasse Rabbit Angstrom se pogings om die werklikheid te ontwyk. In die latere Rabbit redux (1971) vind die hoofkarakter na vele konflikte 'n mate van vrede. Updike het in 1962 'n amusante kinderboek, The magic flute, en die belangwekkende kortverhaalbundel Pigeon feathers and other stories die lig laat sien. Sy mees ambisieuse roman is The centaur (1963), waarvoor hy die National Book Award ontvang het.
Sy roem berus egter veral op Of the farm (1965), The music school (1966) en Couples (1968), laasgenoemde 'n opsienbarende roman wat oor die nuwe seksuele vryheid in 'n klein Amerikaanse dorpie handel. Na Bech: a book (1970) het Updike 'n aantal minder geslaagde werke gepubliseer.
Bronnelys
wysig- Wêreldspektrum, 1982, ISBN 0-908409-68-0, volume 27, bl. 218
Eksterne skakels
wysig
Wikimedia Commons het meer media in die kategorie John Updike.- (en) "John Updike". Encyclopædia Britannica. Besoek op 9 September 2019.
- (en) John Updike by Find a Grave
