KAHLA/Thüringen Porzellan
KAHLA/Thüringen Porzellan is 'n Duitse vervaardiger van porselein vir huishoudelike en hotelgebruik wat sy setel in die gelyknamige nedersetting in die deelstaat Thüringen het.[1] Die onderneming se produkte word tans in 'n sestigtal lande bemark.
| KAHLA/Thüringen Porzellan GmbH | |
  | |
| Tipe | Duitse maatskappy met beperkte aanspreeklikheid (GmbH) |
|---|---|
| Gestig | 1844 |
| Hoofkantoor | Kahla, Thüringen, Duitsland |
| Sleutelpersone | Holger Raithel |
| Gebied bedien | Wêreldmark |
| Industrie | Porseleinvervaardiging |
| Produkte | Porselein vir huishoudelike en professionele gebruik (insluitende porselein wat vir gebruik op bote en jagte van 'n anti-gly-silikon-onderkant voorsien is) |
| Werknemers | 250 |
| Webwerf | Kahla Porzellan |
Geskiedenis wysig
Ambiente-handelskou 2019 in Frankfurt am Main
Ambiente-handelskou 2019 in Frankfurt am Main
Die onderneming is oorspronklik in 1844 deur Christian Eckardt gestig. Op 27 Augustus van dié jaar is die produksie van porselein met twintig medewerkers begin. Kahla het in die volgende dekades tot die grootste porseleinvervaardiger in Thüringen gegroei en was in 1914 reeds een van die voorste porseleinfabrieke in die Duitse Keiserryk. Die onderneming, wat as aandelemaatskappy bedryf is (Kahlaer Porzellanwerke A.G.), het Verder gegroei met die oorname van porseleinfabrieke in Arzberg, Schönwald en Margarethenhütte. Daarnaas is 'n vervaardiger van industriële keramiek, Hermsdorfer Isolatoren, by die maatskappy ingesluit. Ten spyte van 'n uitdagende markomgewing het Kahla tot een van die gewildste handelsmerke vir porselein in Duitsland ontwikkel, veral met sy tafelserviesreekse in kobaltblou asook porseleindekor met strooiblomme en uie-patrone.
Ná die Tweede Wêreldoorlog is die onderneming in die Sowjet-Russiese besettingsone van Duitsland as Sowjet-aandelemaatskappy hervestig. Op 1 Mei 1952 het dit 'n sogenaamde volkseie onderneming (VEB) in staatsbesit geword. Die onderneming is ná die politieke omwenteling in die Duitse Demokratiese Republiek in 1991 geprivatiseer, maar het reeds twee jaar later bankrot gespeel. In 1994 is die onderneming danksy die inisiatief van een van sy voormalige bestuurders, Günther Raithel, as KAHLA/Thüringen Porzellan GmbH herstig.[2]
Die vervaardigingsaanlegte is gemoderniseer om twee produkreekse te produseer, KAHLA Elegance en KAHLA Modern. Die porseleinreeks Aronda, wat deur die ontwerper Barbara Schmidt ontwikkel is, is met sukses ter geleentheid van die huishoudelike handelskou Ambiente in 1994 in Frankfurt am Main bekendgestel. In die lente van 1995 is met die vervaardiging van porseleinreekse vir die professionele hotel- en restaurantmark begin. In 2000 het die Raithel-familie alle aandele, wat nog in besit van die deelstaat Thüringen was, oorgeneem. KAHLA word sedertdien as familie-onderneming bedryf. In Maart 2020 het die onderneming in finansiële moeilikhede beland nadat dit een van sy grootste klante verloor het. Volgens persberigte het die onderneming tegniese probleme met 'n nuwe produksielyn ervaar waarin reeds miljoene belê is. 'n Reddingsplan is in werking gestel.[3]
Die onderneming bedryf 'n vlagskipwinkel in een van Berlyn se voorste winkelstrate, Friedrichstraße, asook 'n aanlynwinkel. Alle aanlynbestellings word deur 'n nie-winsgewende dogteronderneming gehanteer wat werkgeleenthede vir geestelik en liggaamlik gestremdes bied.
Verwysings wysig
- ↑ "Thüringen info: KAHLA - Multifunktionales Porzellan Made in Germany. Besoek op 30 Januarie 2019". Geargiveer vanaf die oorspronklike op 23 Mei 2017. Besoek op 30 Januarie 2019.
- ↑ www.mdr.de: Aus der Pleite auf den Weltmarkt - 25 Jahre Kahla-Porzellan. Besoek op 30 Januarie 2019
- ↑ welt.de, 12 Maart 2020: Kahla Porzellan stellt Insolvenzantrag. Besoek op 16 Mei 2020