'n Karnivoor of vleiseter (vanuit die Latyn carne vir 'vlees' en vorare wat 'vreet' beteken) is 'n organisme wat 'n dieet het wat hoofsaaklik uit diere bestaan, hetsy dit van lewende diere (vir jagdiere) of dooie diere (vir aasdiere) afkomstig is.

Leeus is groot vleiseters; en vereis tot soveel as sewe kilogram vleis per dag. Groot soogdiere, soos hierdie Buffel maak 'n belangrike deel van hul dieet uit.

In die algemeen kan 'n mens diere as karnivore beskou as hulle hoofsaaklik ander diere vreet eerder as om plante te vreet. Daar bestaan ook ongewerweldes wat prooi eet soos spinnekoppe en hottentotsgotte asook verskeie spesies land- en seeslakke. Diere wat uitsluitlik vleis eet word ware karnivore genoem.

Plante wat insekte vang en verteer word karnivoorplante genoem.

Klassifikasie wysig

 
Die Venus vlieëvanger, 'n welbekende karnivoorplant

Karnivore wat hoofsaaklik insekte en soortgelyke ongewerweldes vreet word insektevore genoem, terwyl die wat hoofsaaklik vis eet piskivore genoem word. Karnivoorgedrag wat die vreet van lede van 'n organisme se eie spesie insluit word kannibalisme genoem.

Die woord karnivoor word soms gebruik om na die soogdierorde Carnivora te verwys, maar dit kan misleidend wees. Baie diere uit die orde Carnivora is uitsluitlik vleiseters maar nie almal nie. Bere is byvoorbeeld lede van die orde Carnivora maar is nie karnivore wat hul dieet betref nie en pandas is herbivore. Ander diere soos dolfyne wat vleiseters is, is nie lede van die Carnivora orde nie.

Ware karnivore wysig

 
Hierdie tier se skerp tande en kake is klassieke eienskappe van vleisetende jagdiere

'n Ware karnivoor is 'n dier wat vleis moet eet om te kan lewe.[1] Ware karnivore se fisiologie het nie die vermoë om plantaardige materiale te verteer nie. Die huiskat is 'n goeie voorbeeld van 'n ware karnivoor, soos al die ander diere in die familie Felidae (katfamilie).[2] Karnivore se spysverteringskanale is gewoonlik relatief kort omdat hulle nie die taai sellulose van plantmateriaal hoef te verteer nie.

Sien ook wysig

Verwysings wysig

  1. "Definition: Obligate Carnivore"[dooie skakel] Cats.About.com
  2. Feeding Your Cat: Know the Basics of Feline Nutrition, Lisa A. Pierson, DVM at catinfo.org]