Kassiete
Die Kassiete was ’n volk van die antieke Nabye Ooste wat van omstreeks 1595 v.C. tot die 12de eeu v.C. oor Babilonië geheers het ná die val van die Ou Babiloniese Ryk. ’n Ander naam vir hulle was waarskynlik Galzu.[1]
Hulle het beheer oor Babilon oorgeneem nadat die Hetiete die stad in 1595 v.C. (of 1531 v.C.) verwoes het en ’n dinastie gevestig, eers in Babilon en daarna in Dur-Kurigalzu.[2][3]
Die Kassiete was lede van ’n klein militêre aristokrasie, maar was doeltreffende heersers en plaaslik nie ongewild nie,[4] en hul bewind van sowat 500 jaar het ’n noodsaaklike fondament gelê vir die ontwikkeling van die daaropvolgende Babiloniese kultuur.[3] Die strydwa en perd, wat die Kassiete aanbid het, is in dié tyd vir die eerste keer in Babilonië gebruik.[4]
Die Kassiete se taal is nog nie geklassifiseer nie.[3] Wat bekend is, is dat dit nie verwant was aan óf die Indo-Europese óf die Semitiese óf ander Afro-Asiatiese tale nie en dit was moontlik ’n geïsoleerde taal. Sommige geleerdes stel egter ’n verband voor met die Horities-Urarteïese tale van Klein-Asië.[5] Die aankoms van die Kassiete word egter verbind met die destydse migrasie van Indo-Europese volke.[6][7][8] Verskeie Kassitiese leiers en gode het Indo-Europese name gehad,[6][7][9][10] en dit is moontlik dat hulle oorheers is deur ’n Indo-Europese elite soos die Mitanni, wat oor die Horities-Urarteïessprekende Horiete van Klein-Asië regeer het.[6][7]
Geskiedenis
wysigDie eerste dinastie van Babilon het kort ná Hammoerabi al begin verval as gevolg van onder meer ’n inval van die Hetiete uit Anatolië. Die Kassiete (of Kossaeërs) uit Persië het die wanorde benut om gereelde strooptogte uit te voer.
Hulle is in vroeëre bronne al as vyande van Mesopotamië genoem, maar nou het hulle daarin geslaag om die mag oor te neem. Die magsoorname van die Kassiete is weer eens deur ’n assimilasieproses gevolg. Die Kassiete het die taal en kultuur van die onderworpe volke oorgeneem, met die gevolg dat daar geen breuk in die tradisie was nie.
’n Belangrike deel van die literêre en wetenskaplike tekste uit die Oud-Babiloniese Tyd het onder die Kassiete selfs wettige gesag verkry. Oorspronklike tekste uit hierdie tydperk is skaars en niksseggend. Dit is opvallend dat hoë amptenare van belasting vrygestel is. Dit kan afgelei word uit die sogenaamde kudurru's (fraai uitgevoerde klippe waarmee die landerye afgebaken is). Kopieë van die klippe is as bewysstukke in die tempel bewaar.
Die Kassiete het vanuit hul hoofstad (vermoedelik Dur Kurigalzu) net soos die Assiriërs diplomatieke betrekkinge met die Hetiete en die Egiptenare gehandhaaf.
Skakels
wysig
Hierdie artikel is vertaal uit die Engelse Wikipedia
Verwysings
wysig- ↑ Trevor Bryce, 2009, The Routledge Handbook of the Peoples and Places of Ancient Western Asia: The Near East from the Early Bronze Age to the Fall of the Persian Empire, Abingdon, Routledge, p. 375.
- ↑ "The Old Hittite Kingdom". Encyclopædia Britannica Online (in Engels). Encyclopædia Britannica, Inc. Geargiveer vanaf die oorspronklike op 11 Januarie 2015. Besoek op 8 September 2012.
- ↑ 3,0 3,1 3,2 "The Kassites in Babylonia" (in Engels). Encyclopædia Britannica. Geargiveer vanaf die oorspronklike op 12 November 2014. Besoek op 8 September 2012.
- ↑ 4,0 4,1 "Kassite (people)" (in Engels). Encyclopædia Britannica. Geargiveer vanaf die oorspronklike op 10 Oktober 2014. Besoek op 8 September 2012.
- ↑ Schneider, Thomas (2003). "Kassitisch und Hurro-Urartäisch. Ein Diskussionsbeitrag zu möglichen lexikalischen Isoglossen". Altorientalische Forschungen (in German) (30): 372–381.
- ↑ 6,0 6,1 6,2 Myres, Sir John Lynton (1930). Who Were the Greeks?. University of California Press. p. 102.
- ↑ 7,0 7,1 7,2 MacHenry, Robert (1992). The new encyclopaedia Britannica: in 32 vol. Macropaedia, India - Ireland, Volume 21. Encyclopædia Britannica, Inc. p. 36. ISBN 0852295537.
- ↑ "Iranian art and architecture". Encyclopædia Britannica Online (in Engels). Encyclopædia Britannica, Inc. Geargiveer vanaf die oorspronklike op 9 Oktober 2014. Besoek op 8 September 2012.
- ↑ Piggot, Stuart (1970). Ancient Europe. Transaction Publishers. p. 81. ISBN 0202364186.
- ↑ "India: Early Vedic period". Encyclopædia Britannica Online (in Engels). Encyclopædia Britannica, Inc. Geargiveer vanaf die oorspronklike op 30 April 2020. Besoek op 8 Julie 2015.