Kennaway Girls
Die Kennaway Girls was 'n immigrasieskema tydens die Kaapse grensoorloë om die blanke bevolking van Brits-Kaffraria te versterk.
Vroeg in 1857 het sir George Grey 'n duisend lede van die gedemobiliseerde lede van die Duitse Legioen op die Kaapse Oosgrens gevestig. Die groot getal ongetroudes onder hulle was 'n bron van kommer vir die owerheid. 'n Groep van 153 Ierse weesmeisies is gewerf en met die skip Lady Kennaway na Oos-Londen gestuur. Daar en op King William's Town, Grahamstad, Peddie en Alice het die meeste werk gevind. Almal het nie met Duitse soldate getrou nie en almal het ook nie werk gevind nie. In die oë van die owerheid was hierdie immigrasiepoging minder geslaagd. Daarom het Grey die volgende jaar nog 'n 1 600 Duitsers in Brits-Kaffraria gevestig.
Om 'n afstammeling van 'n Kennaway Girl te wees is in sekere kringe as 'n statussimbool beskou. Die Lady Kennaway Hotel in Oos-Londen herdenk hierdie groep meisies.
Nadat al die passasiers ontskeep is en die skip die hawe weer verlaat het, het die seilskip op 25 November 1857 in 'n kwaai suidoosterstorm in die mond van die Buffelsrivier (Oos-Kaap) vergaan.
Bibliografie
wysig- Turner, Malcolm: Shipwrecks and salvage in South Africa – 1505 to the present. Kaapstad: Struik, 1998. ISBN 0-86977-387-9
- http://archiver.rootsweb.ancestry.com
- http://bygonesandbyways.blogspot.com
- www.cliohres.net
- www.eastlondon.labyrinth.com
- www.wrecksite.eu