Kindle Fire HD
Die Kindle Fire HD is die tweede generasie van Amazon se Kindle Fire-reeks van tabletrekenaars met kleurraakskerms. Die toestel is op 6 September 2012 aangekondig en in twee vormfaktore, 7 en 8,9 duim, beskikbaar. Albei weergawes was in die Verenigde State vanaf 6 September vooraf bestelbaar; die 7 duim-toestel is op 14 September vrygestel, terwyl die 8,9 duim-model (met slegs draadlose netwerk) vanaf 16 November en die 4G-LTE-weergawe daarvan vanaf 18 November te koop was.
Die 7 duim-model is ook op Europese markte met nasionale Amazon-aanlynwinkels (Frankryk, Duitsland, Italië, Spanje en die Verenigde Koninkryk) ingevoer. Die 8,9 duimmodel was aanvanklik net in die Verenigde State beskikbaar, maar is in Maart 2013 ook op die Europese en Japannese mark ingevoer.