Kirsch

Kirsch (Duits: Kirschwasser), ook bekend as kersiebrandewyn, is, soos die naam aandui, 'n brandewyn wat uitsluitlik van gefermenteerde kersies gedistilleer word. Kersies wat vir kirsch gebruik word is gewoonlik kleiner as kersies wat in winkels aangebied word, maar word deur 'n hoër suikergehalte en sterker geur gekenmerk. Die gehalte van die kirsch word hoofsaaklik deur die kersies se geurstowwe bepaal. Kirsch word teen 'n drinktemperatuur van 14-16 °C geniet.

Schwarzwälder Kirschwasser - kirsch uit die Swartwoud

Kirsch is ook 'n gewilde geurmiddel in die kookkuns en 'n belangrike bestanddeel van onder meer Swartwoudkoek, Zuger-kersiekoek (Zuger Kirschtorte), Muotathaler-kersieroomtert (Muotathaler Rahmkirschtorte) en ander Duitse en Switserse koekspesialiteite. Kirsch word in Switserland ook as 'n bestanddeel van kaas-fondues gebruik.

Kirsch uit die Duitse gebied Swartwoud (Schwarzwälder Kirschwasser) is 'n kirsch van oorsprong. Wit alkoholiese dranke soos kirsch, wat van vrugte gedistilleer word, is orals in die Duits-Alemanniese dialekgebied (Baden, Switserland en Elsas) en in Oostenryk gewild.