Koelenhof

Koelenhof is 'n landbougebied by Stellenbosch bekend vir sy wingerdplase.

Die streek grens aan Stellenbosch se noordwesgrens en lê oos van die Devonvallei, suid van die Ou Paarl-pad en wes van Klapmuts. By die Muldersvlei-spoorweghalte in die noorde van die kontrei sluit die spoorlyn vanaf Stellenbosch by die lyn tussen Kaapstad en die Paarl aan.

De Meye, Hoopenburg, Simonsig en Koelenhof is die bekendste wynkelders. Elsenburg-landboukollege en die Mariendahl-proefplaas lê ook in dié gebied.

'n Dertigtal plase het reeds rondom Stellenbosch bestaan voordat die dorp in 1685 gestig is. Van die huidige plaasname wat nog uit daardie tyd dateer, is Idasvallei, Coetzenburg, Welgevallen, Koelenhof, Kromme Rhee, Rustenburg, Mostertsdrif, Zorgvliet, Spier en Jonkershoek.