Kouebokkeveld
Die Kouebokkeveld is 'n boerderygebied rondom Op-die-Berg by 33° suid en 19° 20′ oos in die Wes-Kaap. Die gebied lê in die bron van die Olifantsrivier, noord van Ceres, Prince Alfred Hamlet en die Gydopas op die R303-streeksroete, oos van Porterville en die Groot-Winterhoekberge en suid van die Middelbergpas by Citrusdal. Dit is 65 km lank en die breedte wissel van 24 tot 32 km.
In die winter is dit een van die koudste dele in die provinsie en sneeu kom gereeld hier voor.
Reeds in 1727 het die eerste veeboere hier ingetrek en dit vernoem na die baie springbokke wat hulle aangetref het. Weens die besondere koue het die boere in die winter met hul kleinvee na laer dele getrek, naamlik die Warmbokkeveld.
Vroeg in die 20ste eeu is begin om vrugteboorde aan te plant. Daar word met appels, pere en ander sagtevrugte geboer. Droëvrugte word gemaak en weens die koue kan siektevrye aartappelmoere hier gekweek word.
Op 13 Oktober 1838 was hier 'n meteorietreën wat gepaard gegaan het met 'n skrikwekkende lawaai en helder lig wat ver gehoor en gesien is. Dit was die grootste neerslag van steenmeteoriete (aëroliete) in die suidelike halfrond waarvan wetenskaplikes bewus is.
Trivia
wysigDit is die kontrei van Boerneef van Boplaas.