Kulkuns

Kulkuns of goëlery is 'n uitvoerende kuns wat gehore vermaak met truuks en illusies wat skynbaar onmoontlik of bonatuurlik is. Kulkuns skep die indruk van bonatuurlike mag, maar die illusie van kulkuns word uitsluitlik deur natuurlike metodes geskep. Die gehoor is gewoonlik bewus dat kulkuns deur oëverblindery uitgevoer word, maar die vaardigheid en geheimsinnigheid daaragter fasineer die gehoor.

Die towenaar (skildery).

'n Amateur kulkunstenaar vermaak kinders tydens 'n verjaarsdag partytjie.

Kulkuns kan professioneel of as 'n stokperdjie beoefen word. Baie ure se oefening en geduld word benodig om dit te bemeester. Die persoon wat die kulkunsies uitvoer word 'n kulkunstenaar genoem.

Toertjies

Daar word tussen sewe basiese kategorieë van illusies, of oëverblindery onderskei. Dit sluit in produksie, verdwyning, transformasie, herstelling, teleportasie, levitasie en penetrasie.

Produksie

Die kulkunstenaar produseer iets uit niks uit nie. 'n Voorbeelde van produksie is die gewilde toertjie om 'n "hasie uit die hoed" te trek of om 'n lint uit iemand se oor te trek.

Verdwyning

Die "verdwyning"-toertjie is basies die teenoorgestelde van produksie. 'n Soortgelyke tegniek word toegepas om items te laat verdwyn - byvoorbeeld, wanneer die kulkunstenaar sy hande klap, verdwyn 'n voël vanuit sy hok.

Transformasie

Transformasie-oëverblindery is byvoorbeeld wanneer 'n stukkie materiaal se kleur van rooi na blou verander, of die speelkaart wat gekies is skielik in 'n ander kaart verander.

Herstelling

Die illusie van herstelling (of restorasie) kan deur die gewilde "getoorde tou" gedemonstreer word. Die tou word in twee stukke gesny, die twee ente word aanmekaar gebind en die knoop verdwyn, wat net een reguit stuk tou laat. Of 'n koerant word in stukke geskeur en die kulkunstenaar kan dit weer heelmaak. Restorasie plaas die voorwerp na sy oorspronklike toestand terug.

Teleportasie

Teleportasie is die oordrag van 'n item van een plek na 'n ander, byvoorbeeld om 'n muntstuk wat verdwyn het, in 'n dig geseëlde houer te vind.

Levitasie

Levitasie gebeur wanneer die kulkunstenaar iemand in 'n skynbare "beswyming" plaas, en die persoon in die lug laat sweef. Levitasie is illusies waar iets of iemand "toweragtig" opgelig word.

Penetrasie

Penetrasie is wanneer 'n soliede voorwerp deur 'n ander gaan, soos wanneer 'n "soliede" staalringe inmekaar geskakel word en nie weer uitmekaar kan kom nie.

Sien ook

• Martino, 'n bekende Suid-Afrikaanse kulkunstenaar.

Eksterne skakels

• Wikimedia Commons het meer media in die kategorie Kulkuns.