LM Radio
LM Radio is 'n radiostasie in Maputo, Mosambiek. Histories was dit 'n stasie wat van die destydse Lourenço Marques (tans Maputo) na Suid-Afrika uitgesaai het. Die stasie het in 1936 met kortgolf-uitsendings begin en is in 1975 gesluit.[1] LM Radio was gewild onder jong Suid-Afrikaners en het pop- en rockmusiek uitgesaai wat nie lugtyd op die SAUK se kanale gegun is nie.[2] Dit is in 2010 heropen.
| LM Radio | |
|---|---|
| Gestig | 1936 en opgewek 2010 |
| Formaat | Internet, FM |
| Taal | Engels |
| Uitsaaiarea | Mosambiek (grondlewend), Lesotho (grondlewend); Suider-Afrika (per satelliet) |
| Webtuiste | lmradio.co.za |
| Aanlyn Uitsending | LM Radio: Luister Aanlyn |
Geskiedenis wysig
Die eerste radiostasie in Mosambiek het op 18 Maart 1933 begin uitsaai. Uitsendings is vir 'n ruk in 1934 as gevolg van 'n tekort aan geld opgeskort. 'n Suid-Afrikaner, G.J. McHarry, het by die stasie betrokke geraak en in 1935 is Radio Clube de Moçambique van stapel gestuur, wat hoofsaaklik in Engels uitgesaai het. In 1947 het kol. Richard L. Meyer, wat voor die Tweede Wêreldoorlog die hoofbestuurder van die Internasionale Broadcasting Company van Londen was, tesame met John Davenport die bestuur van Lourenço Marques Radio oorgeneem. Die eerste twee omroepers van die nuwe kommersiële stasie was David Davies (wat as bestuurder aangestel is) en David Gordon. In 1948 verhuis LM Radio na 'n nuwe doelgeboude 4-verdieping gebou wat as "Radio Palace" bekend geword het.
David Gordon verlaat die stasie in 1950 om by Springbokradio aan te sluit. In die laat 1950's verander die stasie sy aanbieding om vir jonger Suid-Afrikaners voorsiening te maak. LM Radio was bekend vir sy Top Twintig Treffersparade en het 'n groot rol in die bevordering van Suid-Afrikaanse kunstenaars en hul musiek gespeel.
LM Radio is in 1972 deur die SAUK oorgeneem. Op 7 September 1974 is dit tydens 'n bloedige opstand in Lourenço Marques beset en is die administrasie deur Frelimo, die Mosambiekse Bevrydingsfront, oorgeneem. Op 12 Oktober 1975, ná Mosambiek se onafhanklikheid van Portugal in Junie van daardie jaar, is LM Radio se fasiliteite genasionaliseer. Die stasie is gevolglik op 13 Oktober 1975 gesluit. Dit is in Suid-Afrika met Radio 5 vervang, wat later 5FM sou word.
David Davies se laaste boodskap op die stasie was: "And now, wherever you are, in the Transvaal, Natal, Orange Free State, the Cape, Southwest Africa or Rhodesia […] greetings. And to you, to you, and especially to you, vaya con Dios" (En nou, waar jy ook al is, in die Transvaal, Natal, Oranje-Vrystaat, die Kaap, Suidwes-Afrika of Rhodesië […] wees gegroet. Vir julle almal, en veral vir jou, wandel met God).
Omroepers soos John Berks, Gary Edwards, Fritz Greyling, Frank Sanders, Robin Alexander, Darryl Jooste (DJ die DJ), George Wayne en David Gresham het almal by LM Radio begin voordat hulle na ander stasies soos Swazi Music Radio (SMR), Radio 702, Springbokradio en ander SAUK-stasies, 2JJ (nou bekend as Triple J in Sydney) en Capital 604, geskuif het.
Heropening wysig
In 2010 is 'n uitsaailisensie aan die nuwe LM Radio onder die handelsmerk "Lifetime Music Radio" toegeken. Dis die enigste Engelse radiostasie in Mosambiek, maar hulle speel ook Afrikaanse musiek. Die inhoud van die stasie word hoofsaaklik vir Suid-Afrika aangepas.
Verwysings wysig
- ↑ (en) LMRadio.net – Aktiwiteite Geargiveer 26 April 2011 op Wayback Machine
- ↑ (af) LM Radio terug op SA lug Geargiveer 16 Desember 2016 op Wayback Machine, Nuus24, besoek op 16 Desember 2016
Eksterne skakels wysig
- (en) Amptelike webwerf