La Clef du cabinet des princes de l’Europe
| Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
La Clef du cabinet des princes de l'Europe was die eerste koerant in Luxemburg. Dit het tussen 1 Julie 1704 en Julie 1794 maandeliks verskyn.
Die nuusblad was die gemeenskaplike projek van Claude Jordan, 'n boekhandelaar, drukker en publisis uit Valence, Frankryk, en die drukker André Chevalier uit Bourg-en-Bresse. Nadat Jordan hom al in twee Nederlandse stede, Leyden en Amsterdam, as uitgewer van 'n koerant, die Gazettes de Hollande, bekwaam het, terwyl Chévalier 'n drukkery in Luxemburg bedryf het, het die twee saamgespan om 'n nuusblad vir Lotaringe te publiseer wat destyds nog onafhanklik van Frankryk was. Die koerant was daarnaas ook op Franssprekende lesers in Luxemburg gemik.
Die dagblad se naam, La Clef du cabinet des princes de l’Europe ou recuëil historique & politique sur les matieres du tems, het al die publikasie se redaksionele missie saamgevat: om vir die leser 'n blik agter die skerms van Europese regeringskabinette te gee. Een van die politieke hoofonderwerpe van dié tyd was die Spaanse Suksessieoorlog.
Die nuusblad het 'n vaste struktuur gehad: internasionale nuus, gekategoriseer volgens koninkryk; 'n rubriek vir "Skinderpraatjies en Aktuele Sake" (plegtighede en jagpartytjies waaraan die koning deelgeneem het, geboortes van koninklike kinders en ander dinge), en resensies van nuwe boeke. Geleidelik is ook steeds meer nuusberigte oor plaaslike parlemente gepubliseer, of artikels oor verligte filosowe wat teen die absolutistiese monargie gekant was.
In 1716 was die twee uitgewers in 'n finansiële stryd gewikkel, en Jordan het hom vervolgens in Parys gevestig waar hy tot en met 1776 die dagblad Suite de la clef, ou Journal historique sur les matieres du tems gepubliseer het.