Le Monde

Le Monde ([lə mɔ̃d]; "Die Wêreld") is 'n Franse dagblad wat op versoek van Charles de Gaulle (as die destydse voorsitter van die Provisionele Regering van die Franse Republiek) op 19 Desember 1944, kort ná die bevryding van Parys, deur die joernalis, uitgewer en voor-oorlogse verslaggewer van die dagblad Le Temps, Hubert Beuve-Méry, gestig is en sedert sy eerste uitgawe ononderbroke op elke namiddag verskyn het - behalwe vir die uitgawe van 4 April 2008 wat weens 'n staking nie uitgegee kon word nie.

Die eerste uitgawe van Le Monde het op 19 Desember 1944 verskyn

Le Monde word onder Frankryk se mees gesiene dagblaaie gereken (naas Libération en Le Figaro) en is die belangrikste publikasie wat deur die La Vie-Le Monde-groep uitgegee word. Die koerant se webtuiste is op 19 Desember 1995 geloods. Die aanlyn-uitgawe is in 2010 agter 'n betaalmuur geplaas. In 2018 was sy gemiddelde sirkulasie 302 624 per uitgawe waarvan sowat 20 000 eksemplare in die buiteland verkoop word. Dikwels is dit die enigste Franse dagblad wat in nie-Franssprekende lande maklik verkrygbaar is.

Van begin af het Hubert Beuve-Méry daarop aangedring dat Le Monde as redaksioneel onafhanklike medium sonder regeringsubsidies uitgegee moes word. Danksy 'n beleid van akkurate nuusdekking het die lesersgetal in die eerste jaar van sy publikasie reeds meer as 150 000 beloop. In die volgende dekades het Le Monde voortgegaan om nasionale en wêreldnuus in diepte te dek en te ontleed. Aangesien redakteurs en verslaggewers in die algemeen vry is om hul eie standpunte uit te spreek (dikwels word redaksionele tekste van twee kommentare met uiteenlopende standpunte voorsien), is daar geen unieke ideologiese vertrekpunt vir Le Monde se verslaggewing nie. Nogtans word die dagblad se politieke standpunte dikwels as effens links van die sentrum gekategoriseer. Le Monde word verbind met 'n soms ietwat ingewikkelde narratiewe styl wat veral by intellektueles aanklank vind.

Le Monde moenie verwar word met die maandelikse nuusblad Le Monde diplomatique nie. Alhoewel 51 persent van dié publikasie in besit van Le Monde is, is dit redaksioneel onafhanklik.