Limavady
Limavady ([lɪməˈvædi]; afgelei van die Iers-Gaeliese benaming Léim a' Mhadaidh "Sprong van die Hond") is 'n markdorp in die Noord-Ierse graafskap Londonderry. Die dorp, wat volgens die Britse sensus van 2001 'n bevolking van 12 043 huisves, is aan die voet van die Binevenagh-bergpiek, 17 myl (27 km) oos van Derry, 14 myl (23 km) suidoos van Coleraine en 105 km noordwes van Belfast in die administratiewe distrik Causeway Coast and Glens geleë.
Limavady Léim a' Mhadaidh (Iers-Gaelies) | |
|---|---|
Dorp | |
 Limavady se hoofstraat | |
  Limavady | |
| Koördinate: 55°03′11″N 6°56′46″W / 55.05306°N 6.94611°W | |
| Land | .svg){kind=small} Verenigde Koninkryk |
| Land (VK) | Noord-Ierland |
| County | Londonderry |
| Distrik | Causeway Coast and Glens |
| Bevolking | |
| • Totaal | 12 043 |
| Tydsone | UTC+00:00 (MGT) |
| • Somertyd | UTC+01:00 (BST) |
| Poskode | BT49 |
| Skakelkodes | 028 |
| Webwerf | limavady.gov.uk |
Limavady is oorspronklik in die vroeë 17de eeu gedurende die Kolonisasie van Ulster gestig. Ondanks die vestiging van 'n linnebedryf kon die dorp in die 19de eeu nie voordeel trek uit die grootskaalse uitbreiding van dié bedryf in die noorde van Ierland nie en het sodoende nog tot in die laat 20ste eeu 'n relatief klein markdorp gebly. Eers vanaf die 1970's het die vestiging van moderne nywerhede en Limavady se aantreklikheid as residensiële sentrum bygedra tot snelle bevolkingsgroei. In die drie dekades tussen 1971 en 2001 het die inwonertal byna verdubbel. Al is Derry, Coleraine en - in 'n mindere mate - Ballymena strawwe mededingers wat kleinhandelgeriewe betref, dien Limavady steeds as 'n belangrike verskaffer van dienste vir die Roe-vallei.[1]