Maak hoofkeuseskerm oop
Die kaskades van die Tweede Los Angeles-akwaduk naby Sylmar vorm die eindpunt van die waterleidingstelsel
Plaaslike waterbronne is ver van voldoende om in die metropool Los Angeles se onversadigbare dors na water te voorsien. 'n Hele reeks waterleidingstelsels voer die kosbare water uit ander landsdele na die halfdroë Suid-Kaliforniese kusgebied

Die Los Angeles-akwaduk (Engels: Los Angeles Aqueduct) is 'n waterleidingstelsel wat deur die stad Los Angeles se Departement van Waterwese en Kragvoorsiening gebou is en bedryf word. Dit behels twee waterleidings, die Los Angeles- of Owensvallei-akwaduk en die Tweede Los Angeles-akwaduk. Die Owensvallei-akwaduk is deur die stedelike Departement van Waterwese (destyds The Bureau of Los Angeles Aqueduct genoem) onder toesig van William Mulholland, die departement se hoofingenieur, ontwerp en gebou.

Die waterleidingstelsel voorsien die metropool Los Angeles van water wat uit die Owensrivier in die oostelike Sierra Nevada-berge na die digbevolkte kusgebied gevoer word. Die bouwerk is deur die American Society of Civil Engineers in 1971 tot die lys van historiese bakens van siviele ingenieurswese (List of Historic Civil Engineering Landmarks) gevoeg.

Die watervoorsieningsprojek was van die begin af omstrede aangesien die omleiding van water uit die Owensrivier in die distrik Mono na Los Angeles landbouaktiwiteite in die Owensvallei 'n nekslag sou toedien. Die voortgesette bedryf van die watervoorsieningstelsel is aan openbare debatvoering oor die akwadukte se impak op die omgewing van die Monomeer en ander ekostelsels onderwerp waaruit nuwe wetgewing en verskeie hofsake voortgespruit het.