Maagdetoring
Die Maagdetoring, ook onder die Turkse naam Kız Kulesi en in die Bisantynse tyd as die Leandros-toring bekend, is geleë op ’n klein eilandjie in die Bosporus in Istanboel, Turkye.
Geskiedenis
wysigDie Maagdetoring is die eerste keer in 408 v.C. deur die antieke Atheense generaal Alcibiades laat bou om die beweging van Persiese skepe op die Bosporus te beheer.[1] In dié tyd was die toring tussen die antieke stede Byzantion en Chrysopolis geleë. Dit is in 1110 n.C. vergroot en as ’n fort herbou deur die Bisantynse keiser Alexios I Komnenos. Die Ottomaanse Turke het dit verskeie kere gerestoureer en effens verander, veral in 1509 en 1763.[2] Die laaste groot veranderings is in 1998 aangebring.[3] Ná die aardbewing van 17 Augustus 1999 is dit versterk as voorsorgmaatreël.
Dit het eeue lank as ’n vuurtoring gedien en is nou omskep in ’n gewilde kafee en restaurant met ’n uitstekende uitsig oor die voormalige Romeinse, Bisantynse en Ottomaanse hoofstad.[4] Private bote vaar ’n paar keer per dag na die toring.[5]
Legende
wysigDaar is baie legendes oor die bou van die toring en sy ligging. Volgens die gewildste Turkse legende het ’n sekere sultan ’n dogter gehad vir wie hy baie lief was. Eendag het ’n orakel voorspel dat ’n giftige slang haar op haar 18de verjaardag sou doodbyt. Die sultan het toe die toring in die Bosporus laat bou om sy dogter so ver as moontlik van die land en slange af te hou om haar te beskerm. Net die sultan mag haar besoek het.
Op haar 18de verjaardag het die sultan vir sy dogter ’n mandjie eksotiese vrugte gebring as ’n verjaardaggeskenk. Hy was verheug dat hy haar kon beskerm en die voorspelling fnuik. Toe sy egter ’n vrug uithaal, het ’n kobra wat tussen die vrugte weggekruip het, haar gepik en sy is in haar pa se arms dood. Dit is waar die naam "Maagdetoring" glo vandaan kom.
Die ouer naam, Leandros-toring, kom van ’n ander storie oor ’n maagd: die antieke Griekse mite oor Hero en Leandros. Hero was ’n priesteres van Afrodite wat in ’n toring by Sestos, aan die rand van die Hellespont (die Dardanelle-seestraat), gewoon het. Leandros, ’n jong man van Abydos aan die ander kant van die seestraat, het op haar verlief geraak. Hy sou elke aand oor die Hellespont swem om by haar te wees. Hero sou elke aand ’n lamp bo in die toring aansteek sodat hy kon sien waarheen om te swem. Een stormagtige winternag het die wind egter die lamp doodgewaai. Leandros het verdwaal en het in die woeste branders verdrink.
Vanweë die ooreenkoms tussen die Dardanelle en die Bosporus, het antieke Grieke en later die Bisantyne gemeen dié toring is die toring in die mite.
Die toring vandag
wysigVandag is daar ’n restaurant op die eerste verdieping van die toring en ’n kafee bo-in.
Die toring is uitgebeeld op die keersy van die Turkse 10-lira-noot van 1966–1981.[6]
Verwysings
wysig- Hierdie artikel is merendeels vertaal vanaf die Engelse Wikipedia-artikel en:Maiden's Tower
- ↑ Ana Britannica: Turkse weergawe van die Encyclopædia Britannica.
- ↑ Ana Britannica: Turkse weergawe van die Encyclopædia Britannica.
- ↑ "Amptelike Maagdetoring-webtuiste: Restourasie". Geargiveer vanaf die oorspronklike op 19 Mei 2009. Besoek op 27 Maart 2010.
- ↑ "Amptelike Maagdetoring-webtuiste: Foto's". Geargiveer vanaf die oorspronklike op 26 Oktober 2017. Besoek op 27 Maart 2010.
- ↑ "Amptelike Maagdetoring-webtuiste: Rooster van bote". Geargiveer vanaf die oorspronklike op 18 Desember 2009. Besoek op 27 Maart 2010.
- ↑ Central Bank of the Republic of Turkey Geargiveer 15 Junie 2009 op Wayback Machine. Banknotemuseum: 10-lira-noot – I. Series Geargiveer 17 April 2009 op Wayback Machine & II. Series Geargiveer 16 April 2009 op Wayback Machine. – URL besoek op 20 April 2009.
Eksterne skakels
wysig| Wikimedia Commons bevat media in verband met Maiden's Tower. |
- Virtuele toer (3D panoramas)
- Amptelike webtuiste Geargiveer 24 Januarie 2010 op Wayback Machine (en)
- Amptelike webtuiste (tr)
- Videobeelde van die Bosporus soos gesien vanaf die Maagdetoring Geargiveer 29 Maart 2010 op Wayback Machine (en)