Maanmuseum
Maanmuseum (Engels: Moon Museum) is 'n klein keramiekskyfie, 19 x 13 mm groot,[1] met kunswerke van ses prominente kunstenaars uit die laat 1960's. Die kunstenaars met werke in die "museum" is Robert Rauschenberg, David Novros, John Chamberlain, Claes Oldenburg, Forrest Myers en Andy Warhol. [1]
Die skyfie is vermoedelik in die geheim geheg aan 'n voetstuk van die maanmodule Intrepid en daarna deur Apollo 12 op die maan gelaat.[2] Maanmuseum word beskou as die eerste ruimtekunswerk.[3]
Alhoewel dit onmoontlik is om te weet of Maanmuseum op die maan is sonder om nog 'n sending te stuur om uit te vind, het tegnici erken dat hulle persoonlike goedere op die Apollo-landers geplaas het, wat versteek is in die lae goudbedekkings om dele van die ruimtetuig wat op die maan gebly het nadat die ruimtevaarders vertrek het.[1]
Geskiedenis
wysigDie konsep vir Maanmuseum is bedink deur die beeldhouer Forrest "Frosty" Myers. Hy het gesê "my idee was om ses groot kunstenaars bymekaar te kry en 'n klein museum te maak wat op die maan kon wees".[1] Myers het verskeie kere probeer om sy projek deur Nasa goedgekeur te kry. Hy beweer die agentskap het hom aan 'n lyntjie gehou: "Hulle het nooit nee gesê nie; ek kon hulle egter nie sover kry om iets te sê nie." In plaas daarvan om deur die amptelike kanale te gaan het hy dit aan boord gesmokkel.
Myers het kontak gemaak met Experiments in Art and Technology (E.A.T.), 'n niewinsgewende groep wat kunstenaars met ingenieurs verbind het om nuwe werke te skep. Deur middel van E.A.T. is Myers bekendgestel aan 'n paar wetenskaplikes van Bell Laboratories, spesifiek Fred Waldhauer. Deur gebruik te maak van tegnieke wat gewoonlik vir die vervaardiging van telefoonbane gebruik word, het die wetenskaplikes die tekeninge geëts wat Myers op klein keramiekskyfies versamel het. Tussen 16 en 20 van hierdie skyfies is geskep,[1] met een wat op die maanlander van Apollo 12 geïnstalleer sou word en die res, kopieë van die oorspronklike, wat uitgedeel sou word aan die kunstenaars en ander wat by die projek betrokke was.[4]
Toe Nasa twyfel of die skyfie op die module toegelaat moet word, het Waldhauer 'n ander plan bedink. Hy het 'n Grumman Aircraft-ingenieur geken wat aan die Apollo 12-landingsmodule gewerk het, en hy was bereid om die skyfie daarop te plaas.[5] Myers het Waldhauer gevra hoe hy sou weet of die kunswerk werklik op die lander sou wees, en hy is meegedeel dat die Grumman-ingenieur vir Myers 'n telegram sou stuur wanneer die skyfie in plek was. Om 15:35 op 12 November 1969, minder as twee dae voor Apollo 12 gelanseer is, ontvang Myers 'n telegram uit Cape Canaveral, Florida, waarin staan "YOUR ON' A.O.K. ALL SYSTEMS GO", en geteken "JOHN F."[1]
Die bestaan van die werk is eers onthul toe Myers The New York Times in kennis stel en dié 'n artikel oor die projek op 22 November 1969 publiseer, terwyl Apollo 12 van die maan terug na die aarde was.[6]
Kunswerke
wysigDaar is ses kunswerke op die keramiekteël, elk in swart-wit. Links bo is 'n tekening van 'n penis deur Andy Warhol.[1][7][8] Warhol se werk is bedek met 'n duim in die beeld wat dikwels met Maanmuseum verbind word, maar ander beelde met die tekening is te vinde.[6] Daarnaas is 'n enkele streep deur Robert Rauschenberg. Regs daarvan is 'n swart vierkant met dun wit lyne wat kruis en soos 'n stroombaan lyk, deur David Novros. Hieronder is die bydrae van John Chamberlain, 'n sjabloonpatroon wat ook soos 'n stroombaan lyk. In die middel onder is 'n geometriese variasie van Mickey Muis deur Claes Oldenburg, 'n gewilde motief vir die kunstenaar in daardie tyd. Forrest Myers het die werk links onder, 'n rekenaargegenereerde tekening, gemaak.
Sowel John Chamberlain as Claes Oldenburg het deur middel van verteenwoordigers bevestig dat hulle tekeninge bygedra het tot Maanmuseum.[4]
Verwysings
wysig- ↑ 1,0 1,1 1,2 1,3 1,4 1,5 1,6 Who is John F.?, History Detectives,Public Broadcasting Service(PBS), Seisoen 8, Episode 1, 7 Junie 2010. Besoek op 14 Julie 2010
- ↑ Cory, Doctorow (29 Februarie 2008). "Secret museum on the moon's surface / Boing Boing". boingboing.net. Besoek op 21 Junie 2018.
- ↑ The Moon Museum: First Space Art Object Lands at Tampa Museum of Art Geargiveer 14 Julie 2011 op Wayback Machine Tampa Museum of Art 18 Junie - 1 Augustus 2010. Besoek op 15 Julie 2010.
- ↑ 4,0 4,1 Moye, David (17 Junie 2010). "Warhol in Space: Apollo 12 Secretly Carried Art to the Moon". Aol News. Geargiveer vanaf die oorspronklike op 18 Junie 2010. Besoek op 14 Julie 2010.
- ↑ [https://www.pbs.org/aboutpbs/news/20100607_historydetectivesandywarholartonmoon.html PBS' HISTORY DETECTIVES PUTS A QUESTION TO THE NATION: IS ANDY WARHOL’S ART ON THE MOON?. PBS. 7 Junie 2010. Besoek op 14 Julie 2010
- ↑ 6,0 6,1 Holy ^%$&! Man Smuggles Art To The &%#$ing Moon! Greg.com. 8 Februarie 2008. Besoek op 14 Julie 2010
- ↑ Stinson, Elizabeth (7 Mei 2015). "We Sent a Dick Pic to the Moon—And We're Doing It Again". WIRED. Besoek op 21 Junie 2018.
- ↑ "The Moon Museum". Museum of Modern Art. Besoek op 28 April 2017.