Maarten Gerritsz Vries

Maarten Gerritszoon Vries (18 Februarie 1589 - 1647), ook de Vries genoem, was 'n 17de-eeuse Nederlandse kartograaf en ontdekkingsreisiger. Hy was die eerste Wes-Europeër wat 'n verslag agtergelaat het van sy besoek aan Sachalin, die Koerile en die See van Ochotsk.

Kaap Aniwa, Kaap Geduld, "Staten-eiland" (Isola di Stati) en die Straat van Vries kan alles op dié Italiaanse kaart uit 1682 gesien word. Soos die kaart wys, het De Vries nie kans gehad om die Straat van Tartarye en van La Pérouse te ontdek nie; die kaartmakers het Hokkaido en Sachalin deel van die vasteland gemaak.

Nie veel van De Vries se lewe is bekend nie. Hy is waarskynlik in 1589 in Harlingen, Nederland, gebore en het baie jare in Taiwan deurgebring. Hy is die bekendste vir sy ekspedisie van 1643 na die Noordwestelike Stille Oseaan en die ontdekking van die kus van Tartarye. Dit was die tweede ekspedisie om te soek na legendariese eilande met goud en silwer in dié oseaan, wat niemand ontdek het nie.

Na die noordeWysig

 
'n Franse kaart uit die vroeë 18de eeu, met die Straat van Vres en van Tartarye aangedui.

Twee skepe, die Castricum onder De Vries en die Breskens onder Hendrick Cornelisz Schaep,[1] het in Februarie 1643 uit Batavia, die hoofstad van Nederlands-Java, vertrek. In Mei het die twee skepe in 'n storm kontak verloor. In die somer van 1643 het die Castricum verby die suidelike Koerile-eilande gevaar en Koenasjir, Itoeroep en Oeroep besoek.

Itoeroep het hulle hulle "Staten-eiland" genoem, hoewel dié naam deesdae net vir Staten Island in New York gebruik word. Op Oeroep het hy die Ainoevolk ontmoet. Hulle het die eiland "Geselskapseiland" genoem en vir Nederland opgeëis.

Die Castricum het tussen die eilande Itoeroep en Oeroep deur gevaar. Die seestraat is later die Straat van Vries genoem. Van daar af het hulle die See van Ochotsk binnegevaar.

Die Nederlanders het toe noord gevaar, sonder om enige land teen te kom, totdat hulle suidwes gevaar en by die eiland Hokkaido aangekom het. Hulle het toe weer noord gevaar en Kaap Aniwa (die suidpunt van Sachalin-eiland), die Golf van Geduld (waar hulle geduldig moes wag dat die mis opklaar) en Kaap Geduld oos daarvan ontdek.

Die skip het in Desember 1643 weer in Batavia aangeland. De Vries is in 1647 aan boord van sy skip dood weens 'n siekte nadat hy 'n onseksesvolle poging gelei het om die Filippyne binne te val.

VerwysingsWysig

SkakelsWysig

  • Spate, Oskar Hermann Khristian (1983). Monopolists and Freebooters. Taylor & Francis. pp. 40–41. ISBN 0-7099-2371-6.