Margaretha Mes Instituut vir Plantfisiologie

Die Margaretha Mes Instituut vir Plantfisiologie op die Hatfieldkampus van die Universiteit van Pretoria, bestaan uit drie geboue naamlik die Bateman-, Stoneman- en Vetman-geboue. Dit het tot stand gekom met die bou van die Bateman-laboratorium in 1949. Die Vetman- en Stoneman-geboue het daarna gevolg en teen 1954 was die drie geboue voltooi, en het bekend geword as die Navorsingsinstituut vir Plantfisiologie. Dié naam is in 1959 verander na die Margaretha Mes Instituut vir Plantfisiologie. Dié drie geboue huisves kantore en laboratoriums wat deur die Departement Plantkunde gebruik word. Die Bateman-laboratorium is vernoem na mnr HW Bateman wat nou betrokke was by die beplanning van die gebou, wat ook een van die eerste fitotrons (geslote kweekhuise) ter wêreld insluit. Die Vetman-gebou is vernoem na ’n veteraan van die Tweede Wêreldoorlog. Die Stoneman-gebou is vernoem na dr. Bertha Stoneman, ’n botanikus van die Hugenoot Universiteitskollege van Wellington wat ’n groot skenking aan die Universiteit gemaak het om die Navorsingsinstituut vir Plantfisiologie te ontwikkel. Prof Margaretha Mes was die hoof van die Departement Plantkunde van 1944 tot 1959 en ’n navorser op die gebied van plantfisiologie. Sy was ook die eerste vrou om die hoof van 'n wetenskap-departement aan 'n Suid-Afrikaanse universiteit te word.