Marguerite Durand
Marguerite Durand (24 Januarie 1864 – 16 Maart 1936) was 'n Franse verhoogaktrise, joernalis, en 'n leidende suffragette. Sy het haar eie koerant op die been gebring, haarself verkiesbaar gestel, en het 'n leeu as troeteldier aangehou. Die Bibliothèque Marguerite Durand is na haar genoem.
Marguerite Durand | |
|---|---|
 | |
| Gebore | 24 Januarie 1864 |
| Sterf | 16 Maart 1936 (op 72) |
| Nasionaliteit | Frans |
| Bekend vir | leidende feminis, koerant- en biblioteekstigter |
| Eggenoot | Georges Laguerre |
Biografie wysig
Marguerite Durand is gebore as die buite-egtelike dogter van 'n moeder uit 'n middelklasfamilie. Sy is na 'n Rooms-Katolieke klooster gestuur om te studeer. Nadat sy haar primêre opleiding voltooi het, het sy by die Paryse Konservatoria ingeskryf, voordat sy in 1881 by die Comédie Française aangesluit het.[1]
In 1888 gee sy haar loopbaan in die teater prys om met 'n opkomende jong prokureur, Georges Laguerre, te trou.[1] Haar man was 'n vriend en aanhanger van die polities ambisieuse generaal van die Leër, Georges Boulanger, en het haar aan die wêreld van radikale populistiese politiek voorgestel. Hy het haar ingetrek by die skryf van pamflette vir die "Boulangistiese" -beweging. Die huwelik was egter van korte duur, en in 1891 skei die egpaar, waarna Durand begin om vir Le Figaro, die toonaangewende koerant van die dag, te skryf. In 1896 het die koerant haar gestuur om oor die Congrès Féministe International (Internasionale Kongres van Vroue) te berig, skynbaar om 'n humoristiese artikel te skryf.
Sy het as 'n veranderde persoon van die Kongres af terug gekeer, soveel so dat sy die volgende jaar op 9 Desember 1897 'n feministiese dagblad genaamd La Fronde gestig het ten einde die werk wat Hubertine Auclert begin het met haar La Citoyenne, voort te sit.[2]
Durand se koerant, wat uitsluitlik deur vroue bestuur was, het die regte van vroue bevorder, insluitend toelating tot die Balievereniging en die École des Beaux-Arts. Die redaksie het ook daarop aangedring dat vroue toegelaat word om tot die Erelegioen verkies te word en toegelaat word om aan die parlementsdebat deel te neem. Dit het in 1910 'n poging deur Durand ingesluit om vroulike kandidate vir die wetgewende verkiesing te organiseer. Tydens die 1900 Exposition Universelle (1900) in Parys organiseer sy die Kongres vir die Regte van Vroue.
Durand was vervul gewees met 'n passie vir die gelykheid van vroue. Sy is onder andere beroemd daarvoor dat sy in die strate van Parys met haar troeteldierleeu genaamd 'Tiger' gestap het. Haar aktivisme was instrumenteel in die totstandkoming van die dierkundige instituut Cimetière des Chiens in die Paryse voorstad Asnières-sur-Seine, waar Tiger uiteindelik begrawe is. Sy het 'n enorme versameling dokumente saamgestel wat sy in 1931 aan die regering oorhandig het. Die jaar daarna het die Bibliothèque Marguerite Durand in Parys geopen. In 2006 was die biblioteek nog steeds oop.[1]
Verwysings wysig
- ↑ 1,0 1,1 1,2 Diana Holmes; Carrie Tarr (30 Januarie 2006). A Belle Epoque?: Women and Feminism in French Society and Culture 1890-1914. Berghahn Books. pp. 40–48. ISBN 978-0-85745-701-1.
- ↑ Roberts, Mary Louise (1996). "Acting Up: The Feminist Theatrics of Marguerite Durand". French Historical Studies. 19 (4): 1103–1138. doi:10.2307/286666. JSTOR 286666.
Verdere leeswerk wysig
- Roberts, Mary Louise (2002). Disruptive acts : the new woman in fin-de-siècle France (in Engels). Chicago, Ill.: University of Chicago Press. ISBN 9780226721255.
- Rabaut, Jean (1996). Marguerite Durand : (1864-1936) : "La fronde" féministe ou "Le temps" en jupons (in Frans). Paris: L'Harmattan. ISBN 978-2738443380.
Eksterne skakels wysig
Wikimedia Commons het meer media in die kategorie Marguerite Durand.
