Mary Brunner
Mary Theresa Brunner (gebore 17 Desember 1943)[1] is 'n voormalige lid van die Mansonbende wat teenwoordig was tydens die moord in 1969 op Gary Hinman, 'n Kaliforniese musikant en kennis van die bende. Sy is op talle klagte in hegtenis geneem, insluitend kredietkaart- en gewapende roof, en sy was 'n ruk lank in 'n vrouegevangenis in Kalifornië.
| Mary Brunner | ||
.jpg)
| ||
| Polisiefoto van Brunner in 1968. | ||
| Gebore | 17 Desember 1943 | |
| Bynaam | Marioche Och Mother Mary Mary Manson Linda Dee Manson Christine Marie Euchts | |
| Ander name | Mary Theresa Brunner (geboortenaam) | |
| Misdaadbesonderhede | ||
| Misdaad | Gewapende roof, kredietkaartroof, onbetaamlike ontbloting | |
| Beweging | Mansonbende | |
| Vonnisbesonderhede | ||
| Vrygelaat | 1977 | |
| Status | Uit op parool | |
Vroeë inhegtenisnemings wysig
Op 21 April 1968 is Brunner en die ander bendelede Manson, Susan Atkins, Ella Jo Bailey, Dianne Elizabeth Lake, Nancy Laura Pitman, Bruce vVan Hall, Marcus John Arneson en Suzanne Scott naby Little Sycamore Canyon in Kalifornië in hegtenis geneem nadat hulle nakend om 'n kampvuur gelê het langs 'n 1952-model bus wat as gesteel aangegee is. Manson is aangekla van motordiefstal en die besit van twee rybewyse.[2][3]
Scott, Atkins, Lake en Van Hall is aangekla van vervalste rybewyse. Pitman, Arneson en Bailey is tronk toe gestuur op aanklagte van wanordelike gedrag en die gebrek aan behoorlike identifikasie. Vyf ander lede is vrygelaat sonder aanklagte. Brunner is aangekla van die bedreiging van die lewe en gesondheid van 'n kind nadat die polisie haar week oue seuntjie, Valentine, gevind het waar hy lê en bewe omdat hy nie behoorlik aangetrek was nie. Die baba is in die sorg van die Ventura-distrikshospitaal geplaas.[2][4]
Aanklagte teen Brunner is later versag en sy het 'n opgeskorte kennis geky. Net 'n paar maande later, in Junie 1968, is Brunner en ander lede van die Mansonbende in die Mendocino-distrik in Kalifornië in hegtenis geneem vir die verskaffing van dwelms aan kinders.[5]
Die Hinman-moord wysig
Bobby Beausoleil is op 25 Julie 1969 saam met Brunner en Susan Atkins by Spahn Ranch weg om Gary Allen Hinman in Topanga Canyon te besoek. Hinman was met die bende bevriend en het dikwels van die lede toegelaat om by hom oor te oornag. Beide Beausoleil en Brunner het voorheen vir kort rukkies by hom gewoon en Brunner was goed met hom bevriend. Beausoleil het 'n mes en 'n 9 mm-Radom-pistool by hom gehad wat hy by die bendelid Bruce Davis geleen het.[6]
Nadat twee vriende van Hinman die polisie gekontak het, is Hinman op 31 Julie 1969 by sy huis vermoor gevind. Sy gesig was aan die linkerkant gesny en hy het twee steekwonde aan die bors gehad. Sy huis is deursoek en die woorde "politieke varkie" is in sy bloed teen die muur geskryf. Sy Volkswagen-kombi en Fiat-stasiewa was weg. Die polisie het Beausoleil op 5 Augustus aan die slaap in Hinman se Fiat gekry. Aan sy gordel was 'n skede met 'n mes in.[7] Beausoleil is in hegtenis geneem en van Hinman se moord aangekla.
Brunner en die bendelid Sandra Good is op 8 Augustus in San Fernando in hegtenis gneem vir die koop van goedere met 'n gesteelde kredietkaart. Brunner het vir die aankope betaal met die alias "Mary Vitasek" en die twee vroue het uit die winkel gevlug toe die kassier onraad bespeur. Die polisie het verskeie gesteelde kredietkaarte en vervalste ID-dokumente by hulle gekry. Hulle is van winkeldiefstal en kredietkaartbedrog aangekla.[8][9][10]
In die nag van 9 Augustus het Charles "Tex" Watson en drie ander bendelede na Cielorylaan 10050, die huis van die swanger aktrise Sharon Tate, gegaan en haar en vier ander op die erf vermoor.
Daar is ooreenstemming dat Manson agter die moord op Hinman gesit het. Brunner was deurentyd teenwoordig en was die sleutelgetuie vir die vervolging. Sy het in Beausoleil se verhoor getuig dat hy Hinman ('n musikant) vermoor het omdat Hinman geweier het om by Manson se popgroep aan te sluit.[11] Daar was ook sprake van ander motiewe. Vincent Bugliosi, die staatsaanklaer, noem in sy boek van 1974 Helter Skelter Manson het geglo Hinman het geld geërf en dat hy die geld wou hê. Hy het Beausoleil, Brunner en Atkins aangesê om na Hinman se huis te gaan en die geld te kry.[12][13]
Volgens Beausoleil weer het die motorfietsbende Straight Satans die dwelm meskalien by hom gekoop wat hy weer by Hinman gekry het. 'n Paar uur later het die motorfietsryers by Spahn Ranch aangekom en beweer die meskalien was met strignien vergiftig. Hulle het hulle geld teruggeëis en gedreig om Beausoleil te vermoor.[6]
Verhoor wysig
Mary Brunner en Susan Atkins is eindelik saam met Bobby Beausoleil aangekla van Gary Hinman se moord. Brunner het later immuniteit gekry in ruil daarvoor dat sy teen Beausoleil en Atkins getuig.[14]
Beausoleil is op 18 April 1970 tot dood veroordeel vir die moord, maar die vonnis is later versag nadat die doodstraf in Kalifornië in 1972 ongrondwetlik verklaar is. Atkins het skuld beken aan haar deelname in die moord en het lewenslange gevangenisstraf gekry. Bruce Davis is later ook aangekla nadat dit bekend geword het dat Beausoleil hom by Spahn Ranch gebel en gevra het om Hinman se Volkswagen-kombi te kom haal.
Brunner het later na die ander lede van die Familie teruggekeer en steun probeer werf vir dié wat aangekla is van die Tate-LaBianca-moorde. Haar seun is na haar ouers gestuur om daar te gaan woon.[15]
Hawthorne-skietery wysig
Mary Brunner het op 21 Augustus 1971 'n wit paneelwa bestuur na 'n winkel in Hawthorne, Kalifornië, vergesel van die ander Mansonbendelede Catherine "Gypsy" Share, Dennis Rice, Charles Lovett, Larry Bailey en Kenneth Como. Die groep het vuurwapens uitgepluk en die klante en klerke aangesê om op die grond te lê. Hulle het toe 143 vuurwapens geneem en in die paneelwa gelaai, terwyl 'n winkelklerk die stil alarm laat afgaan het. Die groep het toe gedebatteer of hulle al die mense in die winkel moes doodmaak.[16]
Die polisie beweer die groep het beplan om 'n Boeing 747 te kaap en te dreig om elke uur 'n passasier dood te maak totdat Manson en ander bendelede uit die tronk vrygelaat word.[16] 'n Polisievoertuig het by die winkel opgedaag en Share het daarop geskiet. Nog polisiemotors het opgedaag en gekeer dat die paneelwa wegry; meer as 50 skote is daarop geskiet en die bende het byna 20 skote op die polisie gevuur. Die groep is aangekeer. Brunner, Share en Bailey is beseer.[14][16]
Brunner is van 20 jaar tot lewenslank gevonnis. Sy is na die Kaliforniese tronk vir vroue gestuur waar Leslie van Houten, Susan Atkins en Patricia Krenwinkel vonnisse uitgedien het vir die Tate-LaBianca-moorde. Brunner het uit die openbare oog verdwyn nadat sy in 1977 op parool vrygelaat is.[14]
Sien ook wysig
Verwysings wysig
- ↑ Crime Magazine: An Encyclopedia of Crime
- ↑ 2,0 2,1 "Nine Nude Hippies Arrested; Found Huddled Around Bonfire". Oxnard Press-Courier. 23 April 1968. p. 9. Besoek op 20 September 2014.
- ↑ "Family Aliases & Associates". The Murders of August ‘69. 29 Julie 2014. Besoek op 18 Maart 2017.
- ↑ "Family Aliases & Associates". The Murders of August ‘69. 29 Julie 2014. Besoek op 20 September 2014.
- ↑ Ukiah Daily Journal, June 24, 1968, p. 1
- ↑ 6,0 6,1 Oui magazine. Jailhouse Interview: Bobby Beausoleil and the Manson Murders via archive.irg (November 1981)]
- ↑ Oui magazine. Jailhouse Interview:Bobby Beausoleil and the Manson Murders. November, 1981
- ↑ "California Penal Code". Geargiveer vanaf die oorspronklike op 29 November 2014. Besoek op 19 November 2014.
- ↑ California Penal Code Geargiveer 28 Junie 2010 op Wayback Machine
- ↑ Sanders, Ed. The Family (2002). pp. 199-201
- ↑ ?p=5084 "Mary Brunner Indicted: Ex-Librarian Asks To Defend Herself", cielodrive.com; accessed March 17, 2017.
- ↑ Bugliosi, pg. 76
- ↑ Bugliosi, pp. 102-03.
- ↑ 14,0 14,1 14,2 Mary Brunner profile Geargiveer 1 Februarie 2009 op Wayback Machine, crime.about.com; besoek op 17 Maart 2017.
- ↑ Michael Brunner aka Valentine Michael Mansfield, son of Mary Brunner. Los Angeles Times video. 18 Julie 2019.
- ↑ 16,0 16,1 16,2 Sanders, Ed. The Family. 2002. pg. 474
Skakels wysig
Hierdie artikel is in sy geheel of gedeeltelik uit die Engelse Wikipedia vertaal.
