Maurice Gamelin
Maurice Gustave Gamelin (20 September 1872 - 18 April 1958) was 'n Franse leërgeneraal. Gamelin word veral onthou vir sy rampspoedige bevel (tot 17 Mei 1940) van die Franse weermag tydens die Slag van Frankryk (10 Mei - 22 Junie 1940) in die Tweede Wêreldoorlog en sy standvastige verdediging van republikeinse waardes.
Gamelin is aan die begin van die Tweede Wêreldoorlog, die opperbevelvoerder van die Franse weermag, beskou as 'n leier met 'n besonderse intellektuele vermoë. Selfs in Duitsland word hy gerespekteer vir sy intelligensie en 'subtiele gemoed', hoewel hy deur sommige Duitse generaals as styf en voorspelbaar beskou is. Ondanks dit, en sy bekwame diens tydens die Eerste Wêreldoorlog, het sy bevel oor die Franse leërs gedurende die kritieke dae van Mei 1940 rampspoedig geblyk. Die historikus en joernalis William L. Shirer het die siening voorgehou dat Gamelin tegnieke van uit die Eerste Wêreldoorlog gebruik het om die Tweede Wêreldoorlog te veg, maar met minder energie en stadiger reaksie.
Gamelin het in die Eerste Wêreldoorlog met onderskeiding onder Joseph Joffre gedien. Hy word daarvoor erken dat hy verantwoordelik was vir die skep van die raamwerk van die Franse teenaanval in 1914 wat gelei het tot 'n oorwinning tydens die Eerste Slag van die Marne. In 1933 word Gamelin aangestel om die Franse leër aan te voer en het toesig gehou oor die moderniserings- en meganisasieprogram, insluitend die voltooiing van die Maginotlinie.
Eerste Minister Édouard Daladier het Gamelin gedurende sy loopbaan ondersteun weens sy weiering om politiek 'n rol te laat speel in militêre beplanning en bevordering, en sy toewyding aan die republikeinse regeringsmodel. Dit was nie 'n geringe aangeleentheid in 'n tyd toe die kommuniste aan die linkerkant en die koningsgesindes en die fasciste aan die regterkant openlik regeringsverandering in Frankryk voorgestaan het nie.
Eksterne skakels
wysig
Wikimedia Commons het meer media in die kategorie Maurice Gamelin.
